Skip to content
Во својот говор од Минхенската безбедносна конференција, украинскиот претседател Володимир Зеленски повика на создавање единствена европска воена сила, велејќи дека континентот мора да биде самостоен во услови на постојана закана од Русија и неизвесност за поддршката од САД – ситуација што тој ја опиша како „нова реалност“.
„Мораме да ги изградиме вооружените сили на Европа така што иднината на Европа да зависи само од Европејците и одлуките за Европа да се носат во Европа“, рече Зеленски во говорот на Минхенската безбедносна конференција.
Украинскиот претседател ја искористи приликата и повтори дека Киев и Европа мора да бидат вклучени во какви било мировни преговори во врска со руско-украинскиот конфликт. Додаде дека Украина нема да се согласи на каков било прекин на огнот без вистински безбедносни гаранции.
„Украина никогаш нема да прифати договори направени зад наш грб без наше учество. Истото правило треба да важи за цела Европа. Нема одлуки за Украина без Украина – нема одлуки за Европа без Европа. Мораме да дејствуваме како Европа, а не како посебни нации“, рече Зеленски.
Во својот говор, Зеленски ја доведе во прашање посветеноста на САД кон Европа, велејќи:
„Дали на Америка и треба Европа? Како пазар, да, како сојузник – не знам.“
Говорот на украинскиот претседател од Минхен доаѓа еден ден по средбата со потпретседателот на САД, Џеј Ди Венс, на која му порача оти на Украина ѝ се потребни вистински безбедносни гаранции пред какви било разговори за ставање крај на војната со Русија.
