Skip to content
Украинскиот претседател Володимир Зеленски денеска изјави дека ќе направи сè што е потребно оваа недела да се одржи најавената средба со рускиот претседател Владимир Путин, оценувајќи дека Путин се плаши од директен дијалог.
– Доколку Путин не е подготвен да дојде во Анкара, претседателот Ердоган и јас сме подготвени да одлетаме во Истанбул. Ќе направиме сè за таа средба да се случи – изјави Зеленски.
Тој нагласи дека само тој има мандат да преговара со Путин:
– Никој освен мене не може да преговара со Путин. Тоа е моја должност. Ако нема средба со Путин, нема да има ни резултати. Ситуацијата веќе е отидена предалеку.
Во изјава објавена на платформата Х, Зеленски додаде:
– Путин се плаши од директни преговори со мене. Ако одбие да дојде и продолжи да ги игра неговите игри, тоа ќе биде последен доказ дека не сака да ја запре војната.
Зеленски предупреди дека, доколку преговорите пропаднат, очекува „строги санкции“ од страна на САД и Европската Унија, бидејќи тоа би покажало дека Русија не е искрено подготвена за дипломатско решение.
Да потсетиме, директната средба меѓу Зеленски и Путин е планирана за четврток во Истанбул, со можност за учество и на американскиот претседател Доналд Трамп. Средбата се смета за нова иницијатива на меѓународната заедница за ставање крај на војната што трае веќе повеќе од три години.
Зеленски потврди дека ќе пристигне во Турција и го покани Путин да се приклучи, истакнувајќи дека е целосно подготвен за состанокот.
Путин, од своја страна, предложи преговори без предуслови, но сè уште не го потврдил своето присуство. Кремљ ги одби западните повици за 30-дневен прекин на огнот, нарекувајќи ги „ултиматуми“.
Неизвесно останува и дали претседателот Трамп, кој моментално е на турнеја на Блискиот Исток, ќе учествува во разговорите. Тој изрази подготвеност да се вклучи, доколку процени дека тоа ќе помогне во постигнувањето на мир.
Зеленски го поздрави евентуалното присуство на Трамп, оценувајќи дека тоа би можело да има позитивно влијание врз мировниот процес.
