Skip to content
Украинскиот претседател Володимир Зеленски утрово соопшти дека речиси целата земја е погодена од масовен руски напад, еден од најсилните во последните месеци. Според официјалните информации, Русија ноќта лансирала повеќе од 470 ударни дронови и 48 ракети од различен тип, балистички и крстосувачки насочени кон украински градови и критична инфраструктура.
Во Тернопил руските проектили погодиле деветкатни станбени згради, по што избувнале пожари. Зеленски потврди дека дел од зградите се целосно уништени и дека под урнатините можно е да има луѓе.
Досега е познато дека десетици граѓани се повредени, а девет лица го загубиле животот. На терен се сите служби за итна интервенција.
Харков под масовен удар – меѓу повредените има и деца
Во Харков нападите започнале уште од вечерните часови, оставајќи зад себе големи штети. Повредени се десетици луѓе, меѓу кои и деца. Оштетени се енергетски капацитети, транспортни објекти и други цивилни инфраструктури.
Енергетската инфраструктура била цел и во Ивано-Франковската област, каде што три лица се повредени, меѓу нив и две деца.
Во Лавовската област повторно биле нападнати критични објекти, додека во Донецката област е повредено едно лице.
Удари има и врз Киевската, Миколаевската, Черкаската, Черниговската и Днипровската област.
Зеленски: „Притисокот врз Русија е недоволен“
Зеленски оценува дека секој ваков напад е доказ дека меѓународниот притисок врз Москва и понатаму не е доволен.
„Потребни се ефикасни санкции и засилена помош за Украина,“ порача тој, нагласувајќи дека најитна потреба се:
- ракети за противвоздушна одбрана,
- дополнителни системи за ПВО,
- проширување на капацитетите на борбената авијација,
- зголемено производство на дронови за заштита на цивилите.
„Русија мора да одговара за стореното. А ние мора да останеме фокусирани на сè што нè зајакнува и ни овозможува да ги соборуваме руските ракети и дронови,“ напиша Зеленски, упатувајќи благодарност до сите меѓународни партнери што продолжуваат да ја поддржуваат Украина.
