Skip to content
Украинскиот претседател Володимир Зеленски би можел да отпатува во САД уште оваа недела за нова рунда суштински разговори со американскиот претседател Доналд Трамп, по првата фаза од преговорите меѓу двете делегации што се одржаа во Женева во неделата, јавуваат повеќе медиуми кои се повикуваат на украински и американски извори.
По состаноците во Женева, Зеленски изјави дека украинската делегација ќе се врати во Киев во понеделник вечерта со „целосен извештај“.
„Врз основа на тие извештаи ќе ги одредиме следните чекори и временската рамка. Ќе продолжиме да ја координираме нашата работа со Европа и со другите партнери ширум светот. Сметаме на постигнување на потребните резултати и им се заблагодарувам на сите што стојат зад Украина,“ рече Зеленски.
Доналд Трамп, пак, во објава на неговата платформа Truth Social праша: „Дали навистина е можно да се постигнува голем напредок во мировните разговори меѓу Русија и Украина?“ додавајќи: „Не верувајте додека не го видите тоа, но изгледа дека нешто добро навистина може да се случува“.
Продуктивни разговори, нова верзија на мировната рамка
Двете делегации, предводени од американскиот државен секретар Марко Рубио и шефот на Кабинетот на претседателот на Украина Андриј Јермак, ги оценија консултациите во Швајцарија како „продуктивни“.
Според заедничката изјава на САД и Украина, подготвена е „ажурирана и прецизирана мировна рамка“ по почетниот протечен мировен план од 28 точки, кој наиде на остра реакција поради условите што значително ѝ оделе во прилог на Москва.
И двете страни ја потврдија својата „подготвеност да продолжат да работат заедно на обезбедување мир кој ќе ја гарантира безбедноста, стабилноста и реконструкцијата на Украина“. Според изјавата, „конечните одлуки според оваа рамка ќе ги донесат претседателите на Украина и САД“.
Откако минатата недела беше објавен прелиминарниот нацрт-договор меѓу САД и Русија, Трамп ѝ даде рок на Украина до четврток да го прифати неговиот мировен план, нарекувајќи го овој период „соодветно време“. Тој, сепак, додаде дека „ако работите се движат добро, роковите може да се продолжат“.
Запрашан дали рокот за Денот на благодарноста сè уште важи, Рубио синоќа во Женева изјави дека вистинската цел е да се постигне договор „што е можно поскоро“.
Москва го отфрла европскиот предлог како „неконструктивен“
Додека Вашингтон преговара со Киев, Русија води паралелни разговори со Турција. Рускиот претседател Владимир Путин и турскиот претседател Реџеп Таип Ердоган разговараа телефонски во понеделник за, како што јавуваат кремљовските медиуми, „американскиот план“ за Украина.
Путин го пофалил протечениот нацрт-договор меѓу САД и Русија, велејќи дека е „во согласност со дискусиите на руско-американскиот самит на Алјаска и во принцип може да претставува основа за конечен мировен договор“.
Со тоа Путин потврди дека позицијата и максималистичките барања на Москва остануваат непроменети.
Путиновиот советник Јуриј Ушаков исто така изјави дека Кремљ е запознаен со европскиот контрапредлог, кој „на прв поглед изгледа целосно неконструктивен“.
„Утрово дознавме за европскиот план, кој на прв поглед не е конструктивен и не ни одговара“, рече Ушаков.
Минатата недела Ердоган се сретна со Зеленски за време на неговата посета на Турција, каде разговарале за можноста да се обноват директните преговори меѓу Киев и Москва.
