Skip to content
Украинскиот претседател Володимир Зеленски денес во Рим се сретна со папата Лав XIV и италијанската премиерка Џорџа Мелони, во рамки на европската дипломатска турнеја со која Киев настојува да обезбеди поддршка и да ја одбие американската идеја за територијални отстапки кон Москва.
Посетата доаѓа еден ден откако Зеленски во Лондон разговараше со британскиот премиер Киер Стармер, францускиот претседател Емануел Макрон и германскиот канцелар Фридрих Мерц, како и со челниците на ЕУ и НАТО во Брисел. Главна тема се ревидираните 20 точки од американскиот мировен план за запирање на руската инвазија, кој според Киев сè уште содржи „нерешени прашања“ за териториите и безбедносните гаранции.
Во обраќање до новинарите, Зеленски беше категоричен дека Украина нема да отстапи ниту дел од својата територија: „Русија инсистира да се откажеме од делови од нашата земја. Ние јасно кажуваме, нема да отстапиме ништо. Тоа е причината поради која се бориме. Ниту законот, ниту меѓународното право, ниту моралот не ни даваат такво право“, порача тој.
Американскиот предлог предвидува Украина да се откаже од регионот Донбас, делумно окупиран од Русија, што Киев и европските сојузници го отфрлаат. Претседателот Доналд Трамп смета дека Москва има „воена предност“, но Кремљ бара контрола врз целиот Донбас, а не само врз деловите што ги држи.
Во разговор со италијанските новинари, Зеленски одговори и на тврдењата на Трамп дека го „користи војната“ за да избегне избори: „Секогаш сум подготвен за избори“, рече тој, додавајќи дека ѝ верува на Мелони и дека Италија ќе продолжи да му помага на Киев.
Зеленски се сретна и со папата Лав XIV во Кастел Гандолфо. Ватикан соопшти дека папата ја истакнал неопходноста од продолжување на дипломатските напори и надежта дека тие ќе донесат „праведен и траен мир“. Двајцата разговарале и за судбината на украинските заробеници и децата депортирани од Русија.
Посетата се одвива во момент кога Италија сè уште не одлучила дали ќе го продолжи мандатот за воена помош за Украина, кој истекува на 31 декември. Дел од коалицијата на Мелони, особено Лега на Матео Салвини, е резервиран кон продолжување на поддршката.
Мелони сепак повтори дека Италија ќе остане на страната на Киев: „Додека трае војната, ќе направиме сè што можеме за Украина да се брани“, изјави таа минатата недела.
