Црногорскиот претседател цени дека е обесхрабрувачки датумот за новото проширување на ЕУ

 Новиот датум кој се споменува во контекст на проширувањето на Европската Унија – 2030 година, е донекаде обесхрабрувачки, особено за земјите кои се најнапредни во тој процес, оцени претседателот на Црна Гора, Јаков Милатовиќ.

Тој по средбата со премиерот на Луксембург Ксавиер Бетел рече дека во претходниот период недостигала посилна комуникација меѓу Црна Гора и црногорските власти и главните градови на земјите членки на ЕУ.

– До сега главно постоеше комуникација меѓу Црна Гора и Европската комисија, но знаете дека важна алка во процесот на членство на Црна Гора е токму поддршката што ја добиваме од земјите-членки, рече Милатовиќ.

Тој додаде дека токму тоа е целта на неговите посети, да се зајакне присуството и комуникацијата меѓу Црна Гора и земјите членки.

Според Милатовиќ, Луксембург, како мала земја слична на Црна Гора во многу аспекти, може да биде силен глас на поддршка за Црна Гора на нејзиниот понатамошен пат кон ЕУ.

– Новиот датум што се споменува, 2030 година, е малку обесхрабрувачки, особено за земјите кои се најнапредни во тој процес, а тука пред се мислам на Црна Гора, рече Милатовиќ.

Тој додаде дека токму тоа е пораката што сака да им ја пренесе на главните градови на земјите-членки на ЕУ и на ЕК – дека Црна Гора, во контекст на процесот на проширување, е најнапредната од сите земји.

– Дека сме земја која има целосно усогласена надворешна и безбедносна политика со ЕУ, дека сме најнапредни во економска смисла, дека немаме отворени прашања со соседните земји, дека сме поминале низ транзиција на власта и на тој начин го втемеливме демократскиот развој на Црна Гора, посочи Милатовиќ.

Тој повтори дека верува оти пристапувањето на Црна Гора во ЕУ може да биде добар сигнал за сите други земји од Западен Балкан и Источна Европа дека процесот на проширување е се уште жив.

– Затоа што некако сега се добива впечаток дека процесот на проширување е жив само на одредени конференции и состаноци на високо ниво. Значи, треба да го оживееме процесот на проширување, а Црна Гора е таа која ја има таа голема историска улога, рече Милатовиќ.