Д-р Александар Трајановски го образложи неговиот план за Аеродром

Во „Back2Back“ интервјуто на Рацин.мк, кандидатот на СДСМ за градоначалник на Општина Аеродром, д-р Александар Трајановски, настапи со прагматичен сет приоритети: темелно чистење на целата општина уште на старт, почеток на нова градинка во првата година, катни и монтажни гаражи на клучни локации и – како социјален акцент – мобилен општински медицински тим за повозрасните и ранливите сограѓани.

Првата порака е едноставна: „ќе се исчисти буквално секоја педа од Аеродром“. Трајановски ја посочи зоната околу комплексот „Џевахир“ како симболичен почеток – локација со хронични диви депонии што, како што вели, ќе се расчисти со помош на општествено одговорни компании кои веќе понудиле механизација и финансиска поддршка. Паралелно со чистењето, планира да стартува изградба на детска градинка во првата година и да ја затвори административната „дупка“ со модерна општинска зграда што ќе штеди пари на граѓаните.

Сообраќајот и паркирањето се вториот столб. Планот содржи три чекори: (1) реорганизација и проширување на паркиралиштата позади ТЦ „Бисер“, (2) катни гаражи во Стар Аеродром – помеѓу „Руди Чаевец“ и „Владимир Комаров“ – и во Мичурин, и (3) монтажни гаражи на едно ниво на потегот од хотел „Русија“ до „Хилтон“, како и претворање на дел од улиците во едносмерни за побрз и побезбеден проток. Целта е јасна: порамномерна циркулација и крај на хаотичното паркирање во најгустите зони. Алекдандар

Младите се во фокус: субвенции за отворање компании за претприемачи до 29 години, финансиска поддршка за ученици што учествуваат на натпревари и мерки за социјално загрозени семејства – плус уредени јавни места за дружење и активен живот, за да не се иселува енергијата на општината туку да се гради тука, дома.

На прашањето за приоритет од три можни проекти – нова противпожарна единица, систем за згрижување на скитници или мобилен медицински тим – Трајановски го избра здравствениот модел. Образложението е демографско и хумано: Аеродром има блиску 100 илјади жители, со значаен удел на стари лица на кои им треба услуга „до врата“ – превоз по отпуст од болница, основна интервенција, проверка и помош кога е најпотребно.

За урбанистичкиот хаос, рецептoт е институционален: зајакнување на инспекциските служби, зголемување на бројот на инспектори и нулта толеранција за „урбана мафија“ што блокира улици, истура бетон во шпиц и окупира тротоари. Превенцијата и санкцијата, вели, мора да одат заедно за да се врати редот на терен.

Транспарентноста е „црвена линија“: јавни и во живо пренесувани седници, редовни месечни и шестмесечни извештаи за трошоци, изведувачи, износи и рокови, како и чести буџетски форуми за директно соочување со граѓаните. Во политичкиот однос, Трајановски порача дека е за кохабитација – простор за опозицијата и граѓаните во систематизациите и проектите – со аргументот дека „не мора сè да се гледа низ партиска призма кога во фокус се граѓаните“.

Низ целиот настап, Александар Трајановски го одржа тоналитетот на оперативност: чистење сега, инфраструктура со рокови и услуги што стигнуваат до луѓето. Ако наративот се преточи во динамика на терен, Аеродром би можел да добие управување што се мери по улици, паркинзи и човечки услуги – а не по слогани.