Де Кро: Белгиското претседателство ќе се фокусира и на иднината и проширувањето на Унијата

Ротирачкото претседателство на Белгија со Советот на ЕУ, кое започнува за еден месец, во првите четири месеци од мандатот ќе се обиде да заврши што е можно повеќе работа на законодавно ниво, а по европските избори, во преостанатите два месеца, вниманието ќе биде насочено кон дискусијата за иднината на Унијата, соопшти денеска белгискиот премиер Александар Де Кро.

Усогласување на законските предлози меѓу двете законодавни институции – Европскиот парламент и Советот на ЕУ, во чие име преговара земјата претседавач, е можна само во првите четири месеци од следната година, бидејќи последната пленарна седница на Европскиот парламент во овој состав се одржува во април. 

Затоа, приоритет на белгиското претседателство ќе биде да заврши што е можно повеќе работа на законодавниот фронт, а последните два месеци од претседателството ќе се фокусираат на дискусија за иднината на ЕУ и подготовка на приоритетите за следниот институционален циклус со новиот свикување на Европскиот парламент и новата Комисија, рече Де Кро на прес-конференција со претседателката на Европскиот парламент, Роберта Мецола. 

Раководството на Европскиот парламент со претседателката Мецола и шефовите на пратеничките групи денеска во Брисел се сретна со членовите на белгиската влада, која од 1 јануари го презема ротирачкото претседателство. 

Де Кро истакна дека во поглед на влошувањето на геополитичкото опкружување, Европската Унија се соочува со важни одлуки за стабилизација на европскиот континент и дека тоа ќе биде приоритет во наредните недели и месеци. Притоа, „важно е да ја покажеме нашата континуирана силна поддршка за Украина“. 

Друг важен елемент на белгиското претседателство ќе биде завршувањето на законодавната работа во неколку важни области, особено во однос на новиот пакт за миграција и азил. Во исто време, големи се очекувањата од актуелното шпанско претседателство, кое би можело да ги комплетира петте законски предлози од пактот за миграција и азил. 

Мецола изрази оптимизам дека во текот на следниот месец може да се постигне договор за пет законски предлози од областа на миграцијата и азилот, за кои се преговара повеќе од една деценија. 

– Тоа би го отворило патот за политички договор непосредно пред Божик, а потоа останува на белгиското претседателство да го преземе и да продолжи со преостанатиот дел од пакетот закони во таа област, за да може Парламентот да гласа за нив во февруари или март, појасни Мецола. 

Третиот важен елемент на белгиското претседателство ќе биде подготовката на приоритетите на Советот на ЕУ за следниот институционален циклус, информира Де Кро. 

Мецола рече дека новиот состав на Парламентот, кој ќе се избира на европските избори од 6 до 9 јуни, ќе треба да ја продолжи дискусијата за иднината на Европската Унија и нејзиното проширување. 

– Очекуваме земјите кандидати да спроведат реформи за да се приклучат на нашата Унија. Во исто време мора да го направиме истото и да се подготвиме – јасно е дека тоа што функционира со 27 членови нема да функционира со 30 или повеќе членови, појасни Мецола.