Електродистрибуција чека потврда од пожарна да ја вклучи струјата во Аеродром

Голем број на граѓани на Скопје од населбите Аеродром, Лисиче и Долно Лисиче во кој живеат околу 90.000 граѓани веќе неколку часа се без електрична енергија, а во дел од повисоките зони каде што се користат пумпи, дел од граѓаните се и без вода.

Електродистрибуција соопшти дека, по барање на Противпожарната бригада на Град Скопје, превентивно е исклучен далекуводот што ги снабдува трафостаниците „Аеродром“ и „Исток“ поради пожарот кај Вардариште. Мерката е донесена од безбедносни причини за да се овозможи непречено гаснење и да се спречат поголеми оштетувања на мрежата.

„Нашите екипи се на терен и се подготвени да интервенираат, но чекаат официјално одобрение од Противпожарната бригада за безбедно нормализирање на снабдувањето со електрична енергија,“ наведуваат од компанијата. Според оперативните процедури, повторното вклучување ќе се врши по фази, веднаш штом пожарникарите потврдат дека ризикот за опремата и за екипите е минимален.

Прекинот ги погоди делови од општина Аеродром и Ново Лисиче. Од Електродистрибуција апелираат граѓаните да ги исклучат чувствителните уреди од напојување додека трае прекинот и да не се приближуваат до далекуводи и подстаници во зоната на интервенцијата. Компанијата најави дополнително информирање за динамиката на рестартирање на системот веднаш по добивање зелено светло од Противпожарната бригада.