ЕУ и Индија ги завршија преговорите за договор за слободна трговија

Европската унија и Индија ги завршија преговорите за договор за слободна трговија, изјави индискиот министер за трговија Раџеш Агравал за Политико.

„Преговорите на официјално ниво се при крај и двете страни се подготвени да го објават успешното завршување на преговорите за Договорот за слободна трговија на 27 јануари“, рече Агравал.

Според договорот, се очекува Индија значително да ги намали царините за европските автомобили и машини, како и за земјоделските производи како што се виното и жестоките пијалоци.

„Тоа би била многу добра приказна за нашиот земјоделски сектор и верувам дека започнуваме сосема ново поглавје во областа на соработката во автомобилскиот сектор и во машинеријата“, изјави за Политико европскиот комесар за трговија, Марош Шефчовиќ.

Во однос на трговијата со услуги, се очекува сектори како што се телекомуникациите, поморските и финансиските услуги да имаат корист од договорот.

„Ова е нешто каде што Индија презема револуционерни чекори кон нови нивоа на соработка, бидејќи ние сме првите со кои се подготвени да разгледаат ваков вид соработка“, рече Шефчовиќ.

Договорот беше постигнат додека раководството на ЕУ беше во тридневна посета на Индија на самит за зајакнување на трговските и одбранбените врски меѓу Њу Делхи и Брисел.

Со прекини на разговорите од 2007 година, договорот доаѓа во идеално време додека Њу Делхи и Брисел се справуваат со високите американски царини и евтината стока од Кина.