Израел ги предаде телата на 15 Палестинци

Израел денес ги предаде телата на 15 Палестинци убиени за време на војната во Појасот Газа, три дена откако беа пронајдени останките на последниот израелски заложник.

Медијаторите се надеваат дека овие потези ќе го отворат патот за спроведување на следната фаза од мировниот план на американскиот претседател Трамп.

Офицерот Рон Гвајли беше еден од 251 заложник земен од милитантите на Хамас во Појасот Газа за време на нападот врз Израел на 7 октомври 2023 година, што ја предизвика војната.

Во времето на договорот за прекин на огнот договорен меѓу Израел и Хамас во октомври, 48 заложници останаа во Појасот Газа, а 28 од нив се претпоставуваше дека се мртви, вклучувајќи го и Гвили.

Предавањето на сите преостанати заложници, живи и мртви, беше клучна обврска според првата фаза од договорот за прекин на огнот.

Меѓународниот комитет на Црвениот крст (МКЦК) објави дека посредувал во враќањето на 15 мртви Палестинци во Појасот Газа откако Израел ги врати останките на Гвили.

Заврши неколкумесечната операција за пронаоѓање на телото

„Ова го означува крајот на повеќемесечната операција што ги обедини семејствата и ја поддржа имплементацијата на договорот за прекин на огнот“, се вели во соопштението на МКЦК.

Операцијата започна во октомври кога Хамас ослободи 20 живи заложници, а Израел 1.808 палестински затвореници, според МКЦК. Во подоцнежните фази, МКЦК помогна во враќањето на мртвите, вклучувајќи 27 од 28-те заложници и 360 Палестинци.

Министерството за здравство во Појасот Газа, управуван од Хамас, го потврди приемот на 15 тела, истакнувајќи дека сега ќе се обидат да ги идентификуваат. Досега се идентификувани само 99 палестински тела предадени од октомври, што ги принуди здравствените службеници да ги закопаат неидентификуваните тела во масовни гробници.

Израел продолжи со нападите

Во меѓувреме, насилството продолжува. Болничарите рекоа дека израелските сили убиле двајца мажи во источен Кан Јунис, област во непосредна близина на операциите на армијата. Израелската војска соопшти дека „извршила прецизен напад во согласност со договорот за прекин на огнот“, насочен кон милитант кој планирал напад врз нејзините трупи.

„Пред нападот, беа преземени чекори за ублажување на штетата врз цивилите“, се вели во военото соопштение.

Министерството за здравство на Газа објави дека израелските воздушни напади, гранатирањето со тенкови и огненото оружје убиле најмалку 490 лица откако прекинот на огнот стапи на сила во октомври, по две години војна што во голема мера ја опустоши палестинската енклава.

Подоцна истиот ден, во израелски воздушен напад загинаа најмалку еден Палестинец, а неколку други беа повредени во кампот Магази во централниот дел од енклавата. Не е јасно што го предизвикало нападот, а израелската војска не одговори веднаш на барањето за коментар.

Израел вели дека палестинските милитанти убиле четворица војници во Појасот Газа за време на прекинот на огнот. Двете страни се обвинуваат меѓусебно за кршење на прекинот на огнот.

Со преминувањето кон втората фаза од договорот за прекин на огнот, САД и посредничките партнери Египет и Катар мора да се соочат со почувствителното прашање за разоружување на Хамас, што групата долго време одбива да го стори. Планот, исто така, предвидува распоредување на меѓународни мировни сили.