Израел предаде уште 45 тела на Палестинци во Газа

Министерството за здравство на Газа соопшти дека ги примило телата на уште 45 Палестинци од Израел, уште еден од условите за кревкото примирје.

Не е јасно дали станува збор за тела на Палестинци кои починале во притвор во Израел или биле земени од Газа од израелски трупи. Во текот на војната, израелската армија ги ископала мртвите барајќи тела на Израелци, заложници на палестинскиот Хамас со кој војувала.

Службениците во болницата Насер го потврдија пристигнувањето на три камиони со тела. Со овој број, досега се предадени тела на 90 Палестинци.

Според договорот за прекин на огнот, Хамас му предал 20 израелски заложници на Израел и треба да ги предаде телата на 28 од мртвите, а досега предал осум тела. Израел објави дека од четирите тела на заложниците предадени вчера, едно не било телото на заложникот.

Се смета дека Израел во понеделник ослободил нешто помалку од 2.000 Палестинци од своите затвори, а исто така предава и тела.

Договорот за прекин на огнот предложен од американскиот претседател Доналд Трамп повикува на предавање на сите заложници, живи и мртви, до рокот што истече во понеделник. Потоа, Хамас мора да обезбеди информации за мртвите заложници и да се обиде да ги предаде што е можно поскоро.

Хамас и Црвениот крст изјавија дека враќањето на телата на заложниците е тешко поради обемното уништување во Газа, а Хамас им кажа на посредниците за примирје дека некои тела се наоѓаат во области контролирани од израелските трупи, до кои нема пристап.