Skip to content
Редакцијата на Рацин.мк во наредните денови ќе објави детални извештаи, кластер по кластер за напредокот на Македонија во изминатата година, со компаративни анализи и на јазик кој секој граѓанин може да го разбере каде се слабостите а каде се силните страни на нашата држава во патот кон ЕУ. На нашиот портал постојано ќе ги обновуваме вестите и ќе ви донесеме анализи и ставови кои реално ја доловуваат ситуацијата на нашата земја.
Европската комисија го оценува напредокот на земјава како мешавина од умерени придвижувања и сериозни застои: институциите функционираат, но политичката поларизација ја јаде реформската енергија. Клучниот факт стои како прва црвена линија – нема обид за уставните измени што државата сама ги прифати во Советот на 18 јули 2022; без нив преговорите остануваат на сопирачка.
Економскиот наратив изгледа подобро на хартија отколку во фискалната реалност. По забавувањето во 2023, реалниот раст во 2024 се забрза на 2,8%, поддржан од инвестиции и јавна потрошувачка, но буџетската дисциплина затаи, таргетите не се испочитуваа, а новото правило за дефицит е одложено до 2027. Конвергенцијата со ЕУ останува бавна, тековната сметка повторно е во дефицит, а ранливоста од енергетски шокови е висока.
Во слободата на изразување, правната рамка формално постои, но практиката шкрипи: нападите врз новинари се намалија во број, не и во тежина и неефикасна разрешница; анти-SLAPP заштита недостига; медиумската регулатива не е усогласена со Европскиот акт за медиумска слобода (EMFA). Измените на Законот за медиуми во април 2025 бараат регистрација на онлајн медиуми за транспарентност, но правилата за медиумска концентрација уште не се европски.
Надворешно-политички, земјата го одржува целосното усогласување со Заедничката надворешна и безбедносна политика на ЕУ и со санкциите против Русија и Белорусија, со мали задоцнувања во формалната имплементација. Истовремено, активна е во мисиите на ЕУ и НАТО и ја продлабочува соработката со европските безбедносни структури.
Во миграцијата и азилот, институционалниот капацитет за управување останува недоволен, привремените центри не исполнуваат стандарди, а азилните постапки се долги и правно слабо образложени. Практиките на враќање кон Грција без соодветни гаранции се оценети како проблем што мора веднаш да престане.
Следете го нашиот блог со сите најнови текстови на овој ЛИНК
