Мицкоски во Струга зборува за градње, а цел град е дупка до дупка

Премиерот Христијан Мицкоски денеска од Струга порача дека градот „се гради и развива“ и дека ќе биде меѓу главните приоритети на Владата во годините што следат.

Настапот доаѓа во период кога Владата и локалната власт како еден од клучните инфраструктурни зафати ја истакнуваат изградбата на собирната улица „Туристичка“, проект вреден 135,85 милиони денари, за кој институциите тврдат дека е во работна фаза.

Дополнителен проблем остануваат првенствено главните улици во центарот на градот како што се Елпида Караманди, Македонска, Пролетерски Бригади, Мирче Ацев и други, кои последен пат виделе асфалт далечната 1973 година кога е поставен канализационен систем.

„Туристичка“ со години е симбол на струшките инфраструктурни проблеми. Уште во 2022 година беше нотирано дека за една од главните сообраќајници во градот нема решение и дека ветувањата за реконструкција остануваат неисполнети, а дури во октомври 2025 Општина Струга соопшти дека е избрана најповолна понуда и дека на терен почнуваат градежни активности за конечно уредување на тој потег.

Контрастот меѓу политичките пораки за развој и секојдневните проблеми во градот останува видлив и надвор од патната инфраструктура. Само минатиот месец Струга повторно се соочи со комунален проблем, откако од локалното јавно претпријатие беше соопштено дека водата од изворот „Шум“ и натаму не е безбедна за пиење.

Во таков амбиент, најавените инвестиции за граѓаните ќе се мерат не според говорите, туку според тоа колку брзо старите проблеми навистина ќе исчезнат од градот.