Skip to content
НАСА лансираше нова сонда наречена IMAP (Interstellar Mapping and Acceleration Probe), со задача да го „исцрта“ невидливиот заштитен меур околу нашиот Сончев систем – хелиосферата. Ракетата „Фалкон 9“ на SpaceX полета од космодромот Кенеди на Флорида на 24 септември, носејќи ја леталката кон точката Лагранж L1, околу 1,6 милиони километри од Земјата во насока на Сонцето.
Хелиосферата е огромен, невидлив балон од честички и магнетни полиња што Сонцето постојано ги исфрла во вселената. Овој „штит“ ја обвива целата планетарна фамилија и ја намалува количината на опасно космичко зрачење од Млечниот Пат што стигнува до Земјата и другите планети. На работ на тој меур, каде што соларниот ветер се судира со материјата од меѓуѕвездениот простор, се наоѓа границата на нашиот космички кварт – линија која сè уште не е прецизно мапирана.
Токму таму ќе „гледа“ IMAP. Опремен со 10 научни инструменти, сателитот ќе ја мери брзината, енергијата и насоката на честиците што стигнуваат од крајот на хелиосферата и од меѓуѕвездениот простор. Новите камери ќе снимаат многу побрзо и со до 30 пати поголема резолуција од постојната мисија IBEX, која од 2008 година дава прва глобална слика на границата на Сончевиот систем.
Научниците се надеваат дека IMAP ќе одговори на две клучни прашања: како точно се забрзуваат честиците до екстремно високи енергии и колку е ефикасен „штитот“ на хелиосферата во блокирање на најопасните космички зраци. Овие податоци се важни не само за теоријата – тие директно влијаат на безбедноста на астронаутите, на сателитите и на чувствителните електронски системи на Земјата, кои страдаат за време на силни соларни бури.
