НАСА во завршни подготовки за историски лет кон Месечината

НАСА влезе во завршната фаза од подготовките за мисијата „Артемис II“, првиот човечки лет кон Месечината по повеќе од пет децении. Четиричлениот екипаж деновиве пристигна во Вселенскиот центар „Кенеди“ на Флорида, каде што треба да ги мине последните процедури пред лансирањето, кое засега е планирано најрано за 1 април.

Мисијата ќе трае околу 10 дена, а астронаутите ќе летаат со капсулата „Орион“, поставена на ракетата SLS. За разлика од идните мисии, „Артемис II“ нема да вклучува слетување, туку облетување околу Месечината и враќање на Земјата, со цел да се тестираат системите за животна поддршка, навигација и топлинска заштита во услови на лет длабоко во вселената.

Екипажот го сочинуваат Рид Вајзман, Виктор Гловер, Кристина Кох и Џереми Хансен од Канадската вселенска агенција. Мисијата носи и неколку симболични пресврти: Гловер треба да стане првиот црн астронаут што ќе се приближи до Месечината, Кох првата жена на ваква мисија, а Хансен првиот неамерикански астронаут што ќе лета надвор од ниската орбита на Земјата.

„Артемис II“ е следниот чекор по беспилотната мисија „Артемис I“ од 2022 година и е дел од пошироката американска програма за враќање на човекот на Месечината. Во последните денови, техничките тимови работат на лансирната рампа 39Б на финалните проверки на ракетата, леталото и одбројувањето.