Неколку илјади демонстранти на традиционалните велигденски мировни маршеви во Германија

 Неколку илјади луѓе денеска прошетаа на традиционалните маршеви за мир што се одржуваат за велигденскиот викенд во Германија, во време обележано со војната во Украина и конфликтот меѓу Израел и Хамас во Газа, соопштија организаторите и полицијата.

Најголемиот марш беше во Берлин, каде се собраа околу 3.500 луѓе, според проценките на полицијата.

Мировни прошетки имаше и во Штутгарт, каде имало околу 1.500 луѓе, во Минхен (околу 850) и во Келн (околу 400), соопшти полицијата.

Главните барања на пацифистите беа прекин на огнот во Украина и мировни преговори меѓу Израел и Хамас.

Традицијата на мировни маршеви во Германија датира од ерата на Студената војна и го достигна својот врв помеѓу доцните 1960-ти и раните 1980-ти, кога до 300.000 луѓе секоја година демонстрираа против трката во нуклеарно вооружување.