Skip to content
Обилните врнежи од дожд и снег предизвикаа излевање на реката Неретва и сериозни поплави во повеќе делови на Босна и Херцеговина, поради што Штабот за цивилна заштита издаде предупредување за зголемена опасност во наредните два дена.
Поплави се регистрирани уште синоќа и рано утрово во подрачјата на Коњиц, Житомислиќ и Буна, а според локалните медиуми, Неретва се излеала и во местото Тушчица, на патот кон Борачкото Езеро.
Поради надојдената вода, главниот патен правец Невесиње – Гацко е затворен за сообраќај.
Очекувани екстремни врнежи
Метеоролозите предупредуваат дека во Херцеговско-неретванскиот кантон (ХНК) се очекуваат екстремно обилни врнежи од дожд, локално и над 200 литри на квадратен метар, што значително го зголемува ризикот од ненадејни поплави, свлечишта и излевање на реките и потоците.
Ситуацијата во Херцеговина се оценува како алармантна – поплавени се делови од Житомислиќи, реката Буна се излеала, а водостојот на Неретва продолжува да расте.
Интензивните врнежи веќе предизвикуваат тешкотии во сообраќајот, опасност од прекини во снабдувањето со електрична енергија, отежнат пристап до одредени населени места и потенцијална закана по животот и здравјето на населението.
Цивилната заштита во зголемена готовност
Од Цивилната заштита на ХНК апелираат до сите надлежни институции, јавни претпријатија и служби да бидат во состојба на зголемена готовност.
„Предлагаме спроведување на превентивни мерки за заштита, засилен мониторинг на водотеците и критичните точки, како и целосна подготвеност на механизацијата и персоналот за итни интервенции“, соопштија од Цивилната заштита.
Оперативниот центар на Цивилната заштита на ХНК континуирано ја следи состојбата на терен, а за денес е најавена и вонредна седница на кантоналниот штаб.
Дрина се повлекува, но Горажде без вода
Во исто време, водостојот на реката Дрина утрово бележи намалување и според мерењата во 7 часот изнесува 262 сантиметри, откако во текот на ноќта беше измерен максимум од 278 сантиметри.
Иако состојбата е постабилна, надлежните предупредуваат дека опасноста сè уште не е целосно помината. Во изминатите 24 часа поплави беа регистрирани на неколку критични точки, особено по десниот брег на Дрина и на одредени патни правци.
Дополнителен проблем за жителите на Горажде е прекинот на водоснабдувањето. Од утрово целиот град е без вода, откако пумпите во фабриката за вода во Витковиќи беа поплавени и превентивно исклучени.
Од ЈКП „6 март“ информираат дека испораката на вода е прекината сè додека не се стабилизира состојбата.
Кантонскиот оперативен центар нагласува дека сите служби остануваат во состојба на готовност и апелира до граѓаните да бидат внимателни и редовно да ги следат официјалните информации од надлежните институции.