Skip to content
Евроамбасадорот во Скопје, Михаилис Рокас, порача дека на Северна Македонија ѝ е потребно внатрешно обединување околу евроинтеграциите за да се надминат пречките на патот кон членство во Европската Унија. Според него, земјата има „целосна поддршка“ за влез во ЕУ, но токму во овој период клучно е да се создаде широка согласност меѓу Владата, опозицијата, Собранието и општеството во целина, за реформите да се забрзаат и да се искористи политичкиот момент.
Рокас говореше во Собранието на промоција на две истражувања за јавното мислење: „Анализа на јавното мислење за пристапување во ЕУ (2014–2025)“ и „Нови глобални неизвесности, стари европски обврски“, каде што акцентот беше ставен на тоа како се менува поддршката за членство и кои се приоритетите што граѓаните ги поврзуваат со европскиот пат. Тој оцени дека дел од јавноста надворешните фактори ги гледа како главна пречка, но дека со домашен консензус „пречките ќе се надминат“.
Во пораката тој се повика и на податоците од истражувањата: според споредбата со минатата година, поддршката за членство пораснала од 61 на 71 отсто, а најсилна е меѓу младите. Рокас посочи дека се намалуваат етничките и партиските разлики околу ЕУ-целта и дека сè повеќе граѓани веруваат дека земјата реално може да стане членка.
Како теми што граѓаните најчесто ги врзуваат со реформската агенда, Рокас ги издвојува владеењето на правото, борбата против корупцијата и заштитата на животната средина, оценувајќи дека токму таму се очекуваат највидливи резултати. На настанот се обрати и германската амбасадорка Петра Дрекслер, која нагласи дека е важно да се следи како се обликува и се менува јавното мислење за евроинтеграциите, особено во услови на нови геополитички неизвесности, но и дека интеграцијата на регионот останува стратешка цел.