Ова е најпогоден град за живеење во светот за 2025 година! Комбинација од четири фактори го стави на прво место

Копенхаген е официјално прогласен за најпријатен град за живеење во 2025 година, со што го симна од тронот претходниот шампион Виена, која три години по ред го држеше првото место на листата на Economist Intelligence Unit (EIU).

Во конкуренција на 173 светски градови, данската престолнина се истакна со „совршени оценки“ во категориите стабилност, образование и инфраструктура, со што го зазеде првото место на глобалниот индекс за квалитет на живот.

Виена годинава падна на второто место, кое сега го дели со Цирих, Швајцарија. Иако сè уште е високо рангиран, главниот град на Австрија забележа пад во категоријата за стабилност, меѓу другото, поради инцидентот на минатогодишниот концерт на Тејлор Свифт, кога настанот беше откажан поради закана за бомба.

Листата вклучува четири европски градови меѓу првите 10: Копенхаген, Виена, Цирих, Женева. Лондон годинава падна на 54. место.

Топ 10 најпогодни градови за живеење во 2025 година според EIU:

Копенхаген, Данска
Виена, Австрија
Цирих, Швајцарија
Мелбурн, Австралија
Женева, Швајцарија
Сиднеј, Австралија
Осака, Јапонија
Окленд, Нов Зеланд
Аделаида, Австралија
Ванкувер, Канада

Што го прави Копенхаген град број 1?

Според EIU, Копенхаген комбинира високо ниво на безбедност, беспрекорен јавен транспорт, квалитетно образование и одлична здравствена заштита. Градот одамна е познат по својата одржливост, велосипедска инфраструктура и стандард на живеење, но оваа година сето тоа беше преточено во највисокиот вкупен резултат.

Барсали Батачарја од EIU истакнува дека глобалните резултати останале стабилни, но дека падот во категоријата стабилност довел до значителни поместувања кај водечките градови. Тоа, вели тој, е токму она што ја чинеше Виена лидерска позиција.

Падот на Канада, неволји во Велика Британија

Некои градови кои претходно беа високо рангирани забележаа пад. Канадскиот Калгари падна од 5-то на 18-то поради послабите резултати во здравствената заштита, додека Торонто и Ванкувер исто така забележаа пад поради проблеми со здравствениот систем и долгите листи на чекање.

Обединетото Кралство бележи пад на рејтингот за стабилност по протестите и немирите во земјата, поради кои Лондон, Манчестер и Единбург паднаа на листата.

Нема многу изненадувања на дното на листата: Дамаск (Сирија) останува најнепријатниот град за живеење, додека Триполи (Либија), Дака (Бангладеш) и Карачи (Пакистан) се веднаш погоре.