Skip to content
Израелскиот премиер Бенјамин Нетанјаху вечерва ќе одржи состанок со своите најблиски советници за да разговараат за можните одговори на она што тие го нарекуваат кршење на примирјето од страна на Хамас откако групата не ги врати телата на 19 заложници, изјави извор за Канал 12.
Хамас тврди дека досега ги предал сите тела што можел да ги најде, но висок израелски функционер истакнува дека Израел не го прифаќа тоа тврдење и наведува дека милитантната група „може да врати уште еден двоцифрен број заложници“, објави The Times of Israel.
Од вкупно 28 заложници за кои се знае дека починале во заробеништво, Хамас досега предал девет тела откако примирјето стапи на сила во петок. Според сознанијата на израелската телевизија Канал 12, израелските власти им ги доставиле на Египет, Катар и Турција точните координати на местата каде што, според нивните информации, се наоѓаат телата на заложниците.
Безбедносните претставници предлагаат, сè додека Хамас не предаде повеќе тела, испораката на материјали за обнова на Газа да се запре или преминот Рафа да се одложи за движење на луѓе. Според истиот извор, Египет испратил порака до Хамас дека мора да ги исполни своите обврски според договорот за прекин на огнот, но во исто време го повикува Израел засега да не воведува дополнителни мерки на притисок.
Израелскиот министер за надворешни работи, Гидеон Саар, претходно во Неапол изјави дека Израел има конкретни информации дека Хамас може да предаде значителен број починати заложници во согласност со договорот.
„Она што го прават сега е сериозно кршење на договорот“, нагласи Сар.
