Skip to content
Заменик шефот на руската дипломатија, Сергеј Рјабков, денеска изјави дека не може да стане збор за какви било отстапки на Русија во процесот на евентуално решавање на ситуацијата во Украина, вклучително и прашања поврзани со таканаречената специјална воена операција.
„Ги поздравуваме напорите на администрацијата на американскиот претседател Доналд Трамп во барањето разумни решенија, но не се можни отстапувања од нашите принципиелни позиции“, рече Рјабков на прес-конференција.
Тој нагласи дека Русија е подготвена да ги постигне своите наведени цели, „по можност преку дипломатски средства“, пренесуваат руските медиуми.
„Доколку има некакви неуспеси, тогаш ќе продолжиме да дејствуваме во рамките на Специјалната воена операција“, рече Рјабков.
Според него, клучното прашање останува политичката волја строго да се спроведат договорените ставови постигнати на состанокот на лидерите на Русија и САД во август во Енкориџ.
„Ние сме посветени на резултатите од состанокот во Енкориџ и ќе продолжиме да дејствуваме во оваа рамка, усогласувајќи го тоа што се случува сега со основните принципи што таму ги артикулираа двајцата претседатели“, додаде тој.
Рјабков изјави дека руската позиција е конзистентна на долг рок и дека се потпира на „причините за кризата“.
„Нашата позиција е многу конзистентна од самиот почеток. Таа се занимава со различни аспекти на моменталната ситуација и главно се фокусира на корените на кризата со која се соочуваме долго време“, додаде Рјабков.
Тој рече дека „елементите договорени во Енкориџ сами по себе се компромис“ и дека тие ќе послужат како основа за разгледување на нови верзии на американскиот мировен план.
„Ова е прашање на дипломатска техника и не може да се дискутира јавно, бидејќи е премногу сериозно прашање“, заклучи Рјабков.
