Санкциите на САД врз НИС стапија на сила: „Залихите се обезбедени, нема паника на пумпите“

По осум одложувања, американските санкции врз Нафтената индустрија на Србија (НИС) конечно стапија на сила утрово, 9 октомври, од шест часот, поради мнозинската руска сопственост во компанијата. Од НИС информираа дека компанијата е подготвена и дека снабдувањето со нафтени деривати и сурова нафта за домашниот пазар е обезбедено, па нема причина за паника кај граѓаните.

Директорката на малопродажба на НИС, Бојана Радојевиќ, потенцираше дека трансакциите за плаќање продолжуваат нормално, картичките функционираат, а залихите на пумпите се доволни за редовно снабдување. „Апел до граѓаните: нема потреба од редици или акумулирање залихи. Сè ќе се одвива како порано“, изјави Радојевиќ.

Националното работно тело за кризни ситуации во нафтениот сектор исто така потврди дека енергетскиот систем не е во опасност. Од НИС соопштија дека од моментот кога компанијата беше ставена на листата SDN во јануари, внимателно ја следи ситуацијата и прилагодува работењето на новите околности. Приоритети остануваат редовното снабдување на домашниот пазар и зачувувањето на социјалната стабилност на вработените.

Американските санкции беа најавени уште во јануари, но нивната примена беше повеќепати одложувана до денес. НИС, како една од најважните компании за економијата на Србија, продолжува со обезбедување на сите видови нафтени деривати и непречено работење на бензинските пумпи.