Сибиха со повеќе објави на социјалните мрежи бара да се убеди Путин да дојде во Истанбул

Украинскиот министер за надворешни работи, Андриј Сибиха, го повика Бразил да го искористи своето влијание и да помогне да се убеди рускиот претседател Владимир Путин да учествува на состанокот во Истанбул и да го поддржи украинскиот предлог за 30-дневно примирје.

„Зборував со бразилскиот министер за надворешни работи, Мауро Виеира, за мировните напори и активните дипломатски контакти оваа недела. Го повикав Бразил да поддржи безусловно 30-дневно примирје како основа за мировни преговори со резултат. Ја потврдив подготвеноста на претседателот Зеленски да се сретне со Путин во Турција и го повикав Бразил да го искористи својот авторитативен глас во дијалогот со Русија за да ја овозможи оваа директна средба на највисоко ниво“, напиша Сибиха на Х.

Во друга објава тој им се заблагодари на колегите од Франција, Германија, Италија, Полска, Шпанија, Велика Британија и ЕУ „за нивната силна заедничка изјава во Лондон“.

„Ја ценам нивната поддршка за безусловно 30-дневно примирје, како и за мировните напори предводени од САД и изгледите за понатамошни разговори оваа недела. Важно е што изјавата потврдува дека Русија не покажала сериозна намера да постигне напредок во мировните напори и нагласува дека мора да го стори тоа без одлагање. Ја ценам решителноста на групата да го зголеми притисокот со санкции врз Русија и поддршката за Украина доколку Путин продолжи да одбива трајно примирје од најмалку 30 дена и пошироки мировни напори. Путин мора да сфати дека одбивањето на мирот има цена“, напиша шефот на украинската дипломатија.

Тој исто така ја поздрави „принципиелната изјава“ на Нордиско-балтичката осумка, со која се повикува Русија безусловно да се посвети на 30-дневно примирје и се поддржува подготвеноста на Зеленски лично да се сретне со Путин во Турција.

„Два дена подоцна, сè уште чекаме Путин да ја потврди својата подготвеност да дојде во Турција и да се сретне со претседателот Зеленски за да се стави крај на убивањата и да се унапреди мирот. Украина останува посветена на мировните напори предводени од САД, Европската Унија и европските партнери. Им благодарам на нашите пријатели од Данска, Естонија, Финска, Исланд, Летонија, Литванија, Норвешка и Шведска за нивната поддршка и искрениот повик за одговорност и мир. Нивниот глас испраќа јасна порака: единството на Европа околу праведен мир нема да ослабне“, напиша Сибиха на Х.