Skip to content
Министерството за транспорт распиша тендер за стабилизација на свлечиштето и санација на пропаднатиот пат кон Теферич, кој е затворен за сообраќај од февруари. Проценетата вредност на работите изнесува околу 46,6 милиони денари, односно приближно 760.000 евра, а понудите ќе се примаат до 24 август.
Во огласот, објавен на 23 јули под број 13198/2026, предметот на набавката е опишан како санација на слегнувањето на коловозната конструкција поради реактивирање на свлечиштето на патот кон месноста Теферич во Општина Кисела Вода. Постапката е отворена, а договорот треба да биде доделен според критериумот најниска цена.
Тендерската постапка предвидува период на договорот од 36 месеци. Овој рок се разликува од претходната јавна најава на министерот за транспорт Александар Николоски, кој на 16 јули изјави дека очекува изведувачот да биде избран за околу еден до еден и пол месец, а санацијата да заврши пред почетокот на зимата.
По затворањето на повикот на 24 август треба да следуваат евалуација на понудите, избор на најповолен понудувач и законски рок за жалби. Поради тоа, почетокот на градежните работи ќе зависи од текот на постапката и од тоа дали ќе има жалби на изборот.
Министерството го презеде проектот откако Владата оцени дека размерот на свлечиштето ги надминува можностите на Општина Кисела Вода и на Град Скопје. Николоски соопшти дека Министерството веќе има изработен проект за стабилизација и санација на делницата.
Проблемот на патот кон Теферич стана видлив во февруари, кога дел од улицата „Мариовска“ во должина од околу 70 метри распука и почна да се свлекува. Коловозот пропадна само пет месеци откако на делницата беше поставен нов асфалт во септември 2025 година.
Во наредните месеци оштетувањето продолжи да се проширува, а на патот се создаде длабока пукнатина и значително слегнување на земјиштето. Според наодите на експерти од Градежниот факултет, станува збор за активно свлечиште со тенденција за понатамошно ширење, поради што била препорачана итна интервенција.
Делницата е важна за жителите на Теферич, Сопиште, Горно Соње и Долно Соње, кои по затворањето мора да користат алтернативни и подолги сообраќајни правци. Поради нестабилноста на теренот, движењето на оштетениот дел е забрането за возила, а локацијата беше оценета како небезбедна и за пешаци.
Општина Кисела Вода досега не соопшти кој ја извршил последната санација од септември 2025 година, кој бил проектант и која фирма го вршела надзорот. Не е објавено ниту колку чинела интервенцијата по која патот повторно пропадна за помалку од половина година.
Со новиот тендер се предвидуваат градежни работи за стабилизирање на теренот и обнова на коловозната конструкција. Конечната цена ќе биде позната по изборот на изведувачот, бидејќи 46,6 милиони денари е проценета, а не договорена вредност на набавката.
