Skip to content
Новото упатство издадено од владата бара отстранување на 140 наслови напишани од жени од студиските програми
Талибанците продолжуваат со строги ограничувања во образованието во Авганистан и насочени се кон жените, овој пат со забрана за книги напишани од жени.
Новото упатство бара отстранување на 140 книги од наставните програми, исто така се укинуваат и предмети поврзани со човекови права.
Според владејачките правила, 140 книги од женски автори се сметаат за „проблематични“ и „спротивни на шеријатот и политиките на Талибанците.“ Во пракса, официјален претставник потврдил дека „никаква книга напишана од жена не е дозволено да се предава.“
Покрај тоа, 18 универзитетски предмети, како „Пол и развој,“ „Улогата на жените во комуникацијата“ и „Социологијата на жените“ се отстранети од наставната програма. Овој потег претставува голем удар врз правата на жените и девојките кои веќе се исклучени од образованието по шесто одделение.
Политички и идеолошки забрани
Новите правила не влијаат само на жените, туку и на целата академска заедница. Трудови од ирански автори и издавачи се исто така забранети во обидот на Талибанците да „спречат инфилтрација на ирански содржини“ во авганистанското образование.
Закија Антели, поранешна заменик-министерка за правда, изјави дека одлуката била очекувана: „Со нивниот мизогинистички менталитет, природно е дека кога жените се исклучени од образованието, ќе бидат задушени и нивните идеи и написи.“
Професорите на универзитетите во Афганистан изразуваат страв за иднината, нагласувајќи дека отстранувањето на овие книги создава „огромен јаз“ во високото образование и го отежнува исполнувањето на меѓународните академски стандарди.
