Skip to content
Италијанската премиерка Џорџа Мелони за време на денешната посета на Вашингтон ќе се обиде да го одврати американскиот претседател Доналд Трамп да воведе нови царини во Европската унија. Иако Мелони не е првиот избор на Брисел за вакви разговори, таа можеби е единствената која моментално има пристап до Трамп, пишува Politico.
„Имаме сила, способност и мудрост да ја надминеме секоја пречка. Веќе поминавме низ многу и нема сомнеж дека не чекаат нови предизвици“, рече Мелони пред нејзиното патување во САД, додавајќи дека ќе се обиде да му објасни на Трамп зошто новите трговски мерки сериозно ќе влијаат на европската економија.
„Мораме да избегнеме трговска војна по секоја цена, бидејќи тоа ќе го ослаби целиот Запад“, нагласи таа.
Личен однос со Трамп
Трамп претходно ја нарече Мелони „прекрасна личност“ и ја покани на неговата инаугурација. Познато е дека тој придава големо значење на личните односи во дипломатијата, па во Белата куќа се очекува оваа средба да ја искористи за тестирање на теренот за евентуален договор – во време кога повторно се зголемуваат тензиите меѓу САД и ЕУ на трговскиот фронт.
Минатата недела Трамп привремено ги стопираше најавените царини и рече дека европските земји му „ласкаат“, што предизвика дополнителна загриженост во Брисел – особено поради симболиката дека токму Мелони сега доаѓа во Вашингтон.
Нејзината блискост со светот на Трамп предизвикува недоверба кај европските сојузници, кои стравуваат дека нејзините пораки би можеле да отстапат од позициите искажани, да речеме, од францускиот претседател Емануел Макрон или од британскиот премиер Кир Стармер.
Мелони во двојна улога
Аналитичарите сметаат дека Мелони успеала да се претстави како политичарка која иако потекнува од екстремната десница, негува трансатлантски односи и соработува со ЕУ, а во исто време има посебен канал на комуникација со Белата куќа. Токму поради оваа „двојна позиција“ европските лидери ги полагаат своите надежи во нејзината способност да посредува во трговскиот договор и евентуално да влијае на ставот на Трамп за војната во Украина.
Според извори од нејзиниот кабинет, Мелони се консултирала со претседателката на Европската комисија Урсула фон дер Лајен за содржината на разговорот. Сепак, многумина во Брисел стравуваат дека Италија би можела да се обиде да добие ослободување од царинскиот режим за себе, што би ја ослабело преговарачката позиција на целата Унија.
Италијанските интереси и претпазливоста од Брисел
Минатата година Италија имаше трговски суфицит од 40 милијарди евра со САД – трет по големина во ЕУ, по Германија и Ирска. Новите царини би можеле сериозно да го загрозат италијанскиот извоз, па не е изненадување што Мелони ги користи сите политички врски што ги има.
Сепак, се поставува и прашањето за безбедносната политика: иако таа досега силно ја поддржуваше Украина, во ЕУ се зголемуваат шпекулациите дека Мелони може да му сигнализира на Трамп дека Италија повеќе нема активно да го блокира укинувањето на санкциите против Русија, што може да го поткопа единството на европскиот фронт.
„Брисел и другите европски метрополи нервозно гледаат што се обидува да постигне Мелони. Но, тие се и очајни – никој не се обидува да ја спречи“, рече Џереми Шапиро од Европскиот совет за надворешни односи.
Единствениот директен контакт со Трамп
Трамп се уште не ја поканил Урсула фон дер Лајен во Вашингтон, а американскиот државен секретар Марко Рубио неодамна ја откажа средбата со Каја Калас, шефицата на европската дипломатија. Така, Мелони во моментов е единствениот европски лидер кој има директен контакт со Белата куќа.
Таа денеска ќе седне со Трамп во Овалната соба пред избрана група новинари, а потоа ќе присуствува на свечен ручек. Веќе утре наутро тој ќе се врати во Рим, каде ќе се сретне со американскиот потпретседател Џеј Ди Венс, еден од најгласните критичари на ЕУ во американската администрација.
Сепак, и покрај пријателската атмосфера, малку може да се навести дека односот на Трамп кон ЕУ ќе се промени. Како што изјави еден американски функционер: „Претседателот на ЕУ не гледа како релевантен играч. За него тоа се земји кои ја мамат Америка. Но, тој има топли односи со некои лидери. Мелони е меѓу нив“.
