Skip to content
На која Дафина да и веруваме? Претседателот на Сојузот на синдикатите на Македонија, Слободан Трендафилов, објави стара телевизиска снимка од јуни 2022 на која пратеничката Дафина Стојаноска јавно им дава поддршка на синдикалците пред Собранието, во момент кога денес таа е во отворен судир со ССМ, а расправијата ескалираше преку социјални мрежи и меѓусебни обвинувања.
Снимката од 2022 година е од периодот кога ССМ организираше штрајк и протести барајќи зголемување на платите во јавниот сектор. Во тогашното обраќање, Стојаноска настапува како опозициска пратеничка и се позиционира на страната на работниците, со порака дека власта мора да ги исполни ветувањата и дека нивното присуство не треба да се толкува како политизирање, туку како поддршка на барањата на граѓаните.
Четири години подоцна, улогите се свртени. Овојпат ССМ излезе со блокади и притисок за минимална плата од 600 евра и линеарно зголемување на останатите плати за 6.000 денари, со најавени акции пред Собранието, стопанските комори и Владата. Додека синдикатот ја турка темата за платите и трошоците за живот, конфликтот со Стојаноска се префрли во зона во која доминираат лични напади.
Во позадина, „видеото од 2022“ отвора непријатен контраст: кога синдикалниот притисок ѝ одговараше на опозицијата, поддршката звучеше принципиелно; кога истиот притисок се случува во време на владеење на партијата од која доаѓа Стојаноска, реториката се префрла кон дискредитација на синдикатот и неговиот лидер. Дополнителен елемент што ја усложнува сликата се потсетувањата дека во јуни 2022 претставници на ССМ имале средби со пратеници од ВМРО-ДПМНЕ, меѓу кои и Стојаноска, токму околу синдикални амандмани за плати и буџетски измени, што укажува дека комуникацијата и „синдикалниот аргумент“ тогаш не биле проблем, туку политички корисна алатка.
Во ваква атмосфера, клучната дилема останува неразјаснета: ако има злоупотреба на службено возило, тоа е прашање за проверка и институционална одговорност; ако има следење, снимање и изложување малолетници, тоа е уште посериозно прашање за граници и злоупотреба на моќ. Во меѓувреме, расправата за минималната плата, за растот на животните трошоци и за тоа кој ќе го плати товарот на инфлацијата лесно се губи во бучавата што ја создава политичката сцена.