Skip to content
Отворањето на реконструираната обиколница кај Крива Паланка отвори и политичка полемика, откако градоначалникот Сашо Митовски јавно реагираше дека не бил поканет на настанот и дека тоа не може да се сведе на протоколарен пропуст. Во својата објава тој порача дека кога институциите се ставаат во втор план, а партиското раководство во прв, пораката е „повеќе од јасна“.
Во реакцијата, Митовски тврди дека станува збор за проект чија подготовка, проектирање и финансиско обезбедување биле реализирани во време на претходната власт и дека затоа отворањето без присуство на првиот човек на општината е прашање на принцип и политичка зрелост. Пораката ја заокружи со оценката дека граѓаните прават разлика меѓу развој и маркетинг и дека бараат резултати и меѓусебна почит.
На свеченото пуштање во употреба присуствуваа владини претставници, меѓу нив премиерот и министерот за транспорт, при што беа испратени пораки за капитални инвестиции, развој на Коридор 8 и нов инвестициски циклус во регионот. На настанот беше нагласено и дека делницата е значајна врска кон Бугарија и Деве Баир.