Владата денеска ќе избира кандидат по ќеф за државен обвинител

Владата денеска на седница треба да ја донесе одлуката за името на новиот државен јавен обвинител, по што предлогот ќе биде испратен во Собранието, каде изборот се прави со најмалку 61 глас. Со тоа постапката влегува во клучна фаза, откако местото остана испразнето по оставката на Љупчо Коцевски во декември минатата година, а функцијата во меѓувреме ја извршува в.д. обвинителката Анита Тополова-Исајловска.

Најавата ја потврди премиерот Христијан Мицкоски, кој денеска изјави дека на владината седница јавноста ќе го дознае името на идниот јавен обвинител или обвинителка. Само пред неколку дена, Мицкоски рече дека консултациите се во завршна фаза и дека владата потоа ќе излезе со официјален предлог.

Изборот доаѓа во чувствителен момент за обвинителството, бидејќи станува збор за позиција што има клучна тежина во водењето на целокупниот јавнообвинителски систем, особено во предметите со висок политички и јавен интерес. Во јануари годинава Собранието ја отвори постапката за избор, а до Владата беа доставени кандидатурите на петмина пријавени. Советот на јавни обвинители претходно требаше да даде мислење за кандидатите што ги исполнуваат условите.

Иако денешната седница треба да го даде владиниот избор, последниот збор сепак ќе го има парламентот. Тоа значи дека денешната одлука е само првиот политички филтер во процес што ќе заврши дури кога пратениците ќе треба јавно да се изјаснат кој ќе застане на чело на обвинителството во наредниот период.