Потрага по убиец во Словенија: „Ја избодел до смрт партнерката пред нејзиниот син“

Словенечката полиција интензивно бара 39-годишен државјанин на Босна и Херцеговина осомничен дека ја избодел до смрт својата 36-годишна партнерка во текот на ноќта во областа Вухред, населба во близина на границата со Австрија.

Полициската управа во Целје соопшти дека мажот е опасен.

Убиството се случило во станбена зграда во центарот на Вухред, каде што, според неофицијални информации, осомничениот живеел со својата партнерка и син. Мажот ја нападнал жената со нож, која починала на местото на настанот поради тешки повреди.

Мотивот за убиството сè уште не е утврден, но полицијата има информации што укажуваат дека мажот во последно време бил ментално нестабилен, пишува 24ur.

Осомничениот избегал од местото на злосторството пеш. Полицијата ја добила пријавата кратко пред еден часот наутро, по што била започната обемна потрага. „Осомничениот по кого трагаме е висок околу два метра. Во моментот на бегството, носел фармерки, црна кошула со кратки ракави и црни чевли“, соопшти Полициската управа Целје.

Во потрагата учествуваат полициски службеници од неколку станици, криминалистички истражители и дресери на кучиња, а подрачјето се следи со дрон и хеликоптер.

Во текот на денот, претресени се сите локации каде што бегалецот би можел да се крие. Слапник потврди дека е известена и полицијата во Хрватска и Австрија бидејќи се сомнева дека избегал во странство. Поради сомневања дека сторителот можеби извршил самоубиство, полициските сили ја претресоа и реката Драва.

Полицијата ги предупредува граѓаните дека бегалецот е опасен и непредвидлив. Во случај да го забележат, се повикуваат да не му се приближуваат, туку да се засолнат на безбедно место и веднаш да се јават во полиција на бројот 113. Увидот на местото на злосторството го спроведоа службеници од Секторот за криминалистичка полиција на Полициската управа Целје.