Две блокади во Брисел: Русија и трговијата со израелските населби

Амбасадорите на земјите членки на Европската Унија се обидуваат да постигнат договор за две чувствителни прашања што со недели ја делат Унијата – новиот пакет санкции против Русија и можните ограничувања на трговијата со израелските населби на окупираните палестински територии.

Најголемата пречка за усвојување на 21. пакет санкции против Русија е противењето на Грција на предложените ограничувања за транспортот на руски течен природен гас. Атина бара промени со кои грчките бродски компании би можеле да продолжат да превезуваат руски гас кон трети земји и по стапувањето во сила на забраната.

Грција тврди дека ограничувањата нема значително да ги намалат приходите на Москва, туку ќе им го препуштат транспортот на компании од САД, Кина и Јапонија. Земјата располага со една од најголемите трговски флоти во светот, а нејзините компании имаат значителен удел во глобалниот транспорт на течен природен гас.

Предложениот пакет е насочен пред сè кон рускиот финансиски сектор и опфаќа 215 компании и институции, меѓу кои повеќе од 90 банки. Со мерките треба да се ограничат трансакциите преку помали банки, криптовалути и компании од трети земји што ѝ помагаат на Русија да ги заобиколува постојните санкции.

Преговорите се одвиваат под временски притисок бидејќи европските дипломати заминуваат на летна пауза, а механизмот за ограничување на цената на руската нафта е привремено продолжен до 23 јули. За усвојување санкции е потребна согласност од сите 27 членки на Унијата.

Паралелно, земјите членки немаат заедничка позиција ниту за трговијата со производи од израелските населби на окупираниот Западен Брег. Европската комисија предложила три можни мерки – систем на увозни дозволи, високи царини или целосна забрана за трговија.

Шефицата на европската дипломатија Каја Калас соопшти дека целосната забрана добила најголема поддршка меѓу министрите за надворешни работи, но ниту една од опциите засега нема доволно гласови. Германија бара повнимателен пристап кон Израел, додека против целосна трговска забрана е и Чешка.

Дел од земјите, меѓу кои Шпанија, Ирска и Холандија, бараат поостри мерки поради проширувањето на населбите и насилството врз Палестинците. Европската Унија повтори дека израелските населби на окупираниот Западен Брег се спротивни на меѓународното право, позиција што Израел ја оспорува.

И околу ова прашање постои правна дилема дали одлуката мора да биде донесена едногласно или може да се усвои со квалификувано мнозинство. Поради отсуството на договор, амбасадорите на земјите членки добија задача да продолжат со разгледување на предложените трговски мерки.