Skip to content
Изборната кампања за општите избори, кои ќе се одржат на 4 октомври, официјално започнува денес и ќе трае до утрото на 3 октомври, кога стапува на сила изборниот молк, објави Централната изборна комисија (ЦИК) на Босна и Херцеговина.
ЦИК апелираше до сите политички субјекти, кандидати и нивните поддржувачи и медиумите строго да го почитуваат Изборниот закон, со посебен акцент на забраната за употреба на говор на омраза во јавниот простор.
„Говор на омраза е секоја форма на јавно изразување или говор што предизвикува или поттикнува омраза, дискриминација или насилство кон кое било лице или група лица, врз основа на раса, боја на кожа, националност, пол или религија, етничко потекло или која било друга лична карактеристика или ориентација што поттикнува дискриминација, непријателство и насилство“, потсети ЦИК.
Тие истакнаа дека сите политички субјекти имаат право да водат кампања во мирна средина и да организираат митинзи.
„Исто така, тие се должни да обезбедат еднаква промоција на кандидатите од двата пола во сите јавни и медиумски настапи. Надлежните општински власти се должни да обезбедат еднаков третман на политичките субјекти сертифицирани за учество на избори во нивните барања за користење на јавни места и јавни објекти за цели на кампањата, вклучително и одржување состаноци, истакнување реклами, плакати, постери и друг сличен материјал“, изјавија тие.
Тие предупредија дека ЦИК има овластување да ги санкционира прекршувањата на Изборниот закон на БиХ, финансиски, но и со отстранување на кандидатите од листата и откажување на сертификацијата на политичкиот субјект.
