Ѓоковиќ е најпребаруван тенисер на Google и тоа седма година по ред

Новак Ѓоковиќ не доминира само со тениските рекорди, српскиот ас и најмногу пати завршил како најпребаруван тенисер во светот откако Google Trends ги следи глобалните пребарувања.

Според јавно објавена анализа на податоците од пребарувањата од 2004 година наваму, Ѓоковиќ бил годишен лидер во седум различни години. Зад него се Серена Вилијамс со пет години на врвот, како и Марија Шарапова и Роџер Федерер со по три.

Податоците не значат дека Ѓоковиќ во секој момент имал најголем вкупен број пребарувања, туку дека почесто од другите тенисери бил име со најсилен годишен интерес на Google. Google Trends не објавува апсолутен број пребарувања, туку релативен индекс на интерес и споредби меѓу поими во определен период.

Неговата најсилна серија дошла во периодот од 2020 до 2023 година, кога четири години по ред бил најпребаруваниот тенисер, пред Карлос Алкараз да го преземе врвот во 2024 година. Анализата за периодот од 2010 година наваму покажува дека само шест тенисери успеале да завршат година како глобален лидер во пребарувањата.

Најсилната официјална потврда од Google дојде во 2022 година. Во глобалниот извештај „Year in Search“, Ѓоковиќ беше прв на листата на спортисти со најголем раст на интересот, пред Рафаел Надал и Серена Вилијамс. Истата година беше и шестиот најбрзо растечки поим во категоријата личности во светот.

Резултатот од 2022 година беше поврзан со огромното внимание околу неговата депортација од Австралија, статусот на вакцинација и забраните за настап на дел од турнирите. Тоа покажува дека пребарувањата не се мерат само според спортски успеси, туку и според настаните и контроверзиите што го привлекуваат глобалното внимание.

Методологијата на Google дополнително прави разлика меѓу „најпребарувани“ и „најтрендирани“ поими. Годишните листи ги рангираат пребарувањата што имале најголем раст во споредба со претходната година, а не нужно оние со најголем апсолутен број внесувања.

Сепак, седумте години на врвот го издвојуваат Ѓоковиќ како тенисер со најдолготрајно и најчесто повторувано глобално присуство во пребарувачот во последните две децении.