Руски ботови спроведуваат „кампања за дезинформации во корист на Кремљ“ за поддршка на Милановиќ

Руски ботови спроведуваат „кампања за дезинформации во корист на Кремљ“ за поддршка на претседателскиот кандидат Зоран Милановиќ, тврди истражувањето на лондонскиот Центар за информациска отпорност (ЦИР), пренесува Политико.

Според извештајот, „проруски, анти-ЕУ и анти-НАТО мрежи на ботови“ се активирале за да го засилат актуелниот претседател Милановиќ пред првиот круг од изборите одржани на 29 декември. Милановиќ, кој е претседател од 2020 година и член на Социјалдемократската партија, е познат по својата критика кон НАТО, Европската унија и западните санкции против Русија.

Иако во првиот круг освои речиси 50% од гласовите, Милановиќ не успеа да обезбеди победа. Во вториот круг на 12 јануари ќе се соочи со Драган Приморац, поддржан од владејачката Хрватска демократска заедница.

Истражувачите од ЦИР откриле дека проруски ботови активно споделувале содржини на социјалните мрежи, фалејќи го Милановиќ и критикувајќи го неговиот противник. Една неавтентична сметка на Фејсбук, идентификувана во извештајот, објавувала над 100 постови дневно во поддршка на Милановиќ или напади врз Приморац.

Ова следи по слична ситуација во Романија, каде што ултранационалистичкиот проруски кандидат Калин Георгеску неочекувано победи во првиот круг од претседателските избори. Изборите беа поништени откако се откри дека Георгеску имал корист од „руски стил“ кампања на ТикТок.

Милановиќ е подложен на критики за своите популистички говори и споредби со Доналд Трамп, како и за неговото противење кон воената помош за Украина. Сè уште не е јасно како овие обвинувања ќе влијаат на исходот од претстојниот втор круг од изборите.