Дали конечно Сири конечно ќе стане паметна?

Siri AI е најважниот обид на Apple да покаже дека не ја изгубил трката во вештачката интелигенција, откако на WWDC26 во Купертино ја претстави најголемата промена на својот дигитален асистент по години критики, одложувања и растечки притисок од ChatGPT, Gemini и Claude.

Apple на конференцијата, која трае од 8 до 12 јуни, ја отвори новата фаза на Apple Intelligence со порака дека вештачката интелигенција мора да биде вградена во уредите што луѓето веќе ги користат секој ден. Во центарот е Siri AI, нова верзија на асистентот која треба да разбира што има на екранот, да се сеќава на претходни разговори и да пронаоѓа информации од личниот контекст на корисникот.

Тоа е суштинската карта на Apple. Компанијата не се обидува само да направи уште еден чат-бот, туку асистент што може да знае каде е пораката, кој документ бил испратен, што стои во календарот и што корисникот навистина сака да направи. Токму тука е предноста, но и ризикот: iPhone содржи огромна количина лични податоци, а Apple мора да ги претвори во корисна AI-функција без да го урне имиџот на компанија што ја продава приватноста како главна вредност.

Reuters јави дека новата Siri ќе има подобро препознавање говор, поконверзациски тон, можност да анализира содржина на екранот и да користи пошироко веб-знаење. Apple најави и посебна апликација поврзана со Siri AI, синхронизирана преку приватна cloud-инфраструктура.

Но приказната не е само технолошка. Apple две години беше под притисок дека заостанува зад конкурентите, додека OpenAI, Google, Microsoft и Anthropic ја презедоа јавната имагинација околу AI. Затоа WWDC26 е повеќе од редовна програмерска конференција. Ова е тест дали Apple може да ја претвори Siri од симбол на пропуштена шанса во вистински личен асистент.

Засега има и ограничувања. Reuters објави дека Siri AI првично нема да биде достапна на iPhone и iPad во ЕУ, а нема да биде достапна во Кина, додека Apple работи на регулаторните прашања. Новата Siri најпрво ќе стартува на англиски јазик, со ветување дека други јазици ќе следуваат брзо.

Apple денеска не продава само нова функција. Продава уверување дека AI може да биде лична, практична и приватна. Прашањето е дали корисниците, по две години чекање, ќе поверуваат дека Siri конечно станала паметна.