Skip to content
Жена против која Основниот суд во Кратово определил мерка на претпазливост со забрана да го посетува локалитетот „Куклица“, на 11 јули повторно била затекната кај заштитениот споменик на природата. СВР Куманово најави дека по целосното документирање на настанот ќе поднесе соодветна пријава.
Полицијата постапила откако посетителка пријавила дека на домашни и странски туристи им бил попречуван пристапот до локалитетот. Полициски службеници излегле на терен и утврдиле дека лицето со иницијали С.Д.Б. престојува на местото и покрај изречената судска забрана.
„Од страна на Основниот суд Кратово против С.Д.Б. донесено е решение со кое се определуваат мерки на претпазливост, во рамки на кои е и забрана за посетување на локалитетот Куклица, но С.Д.Б. на 11.07.2026 била затекната на локалитетот. По целосно документирање на случајот ќе биде поднесена соодветна пријава“, соопштиле од СВР Куманово.
Новиот случај следува по повеќемесечни реакции од посетители и од Општина Кратово, кои тврдат дека пристапот до „Куклица“ бил ограничуван, а од туристите неовластено биле барани пари за влез. Во дел од сведоштвата се наведуваат и навреди, закани, фрлање камења и користење кучиња за заплашување на посетителите. Овие наводи треба да бидат утврдени во постапките пред полицијата, обвинителството и судот.
Во случајот се водат одделни судски постапки и се применуваат различни судски мерки. Градоначалникот на Кратово, Тодорче Николовски, претходно соопшти дека е донесена времена мерка со која Стојна Димитровска Бут и нејзиниот татко Милош Димитровски треба да се оддалечат од локалитетот и да го предадат во владение на надлежните институции. Одделно од тоа, против С.Д.Б. била определена мерка на претпазливост со забрана за посетување на „Куклица“, за која полицијата сега утврдила дека не била почитувана.
Општина Кратово во јуни информираше и дека обезбедила првостепена пресуда во граѓанска постапка, со која Здружението „Извор“ и лицата поврзани со него се задолжуваат да го предадат просторот во владение на Општинската установа „Музеј на град Кратово“ и да ги отстранат поставената дрвена куќичка и другите предмети. Таа пресуда била обжалена и се наоѓала пред второстепен суд, поради што сè уште немала својство на правосилна одлука.
Правниот статус на „Куклица“, сепак, не е спорен. Со закон донесен во 2008 година, просторот со површина од 55,7 хектари е прогласен за споменик на природата поради геоморфолошките особености од исклучително значење. Законот изречно определува дека со локалитетот управува Општина Кратово, а во нејзино име градоначалникот.
Градоначалникот, според истиот закон, е должен да го чува и одржува локалитетот, да спречува штетни активности од физички и правни лица, да воспостави чуварска служба и да создава услови за развој на туризмот според принципите на одржливото управување. Екотуризмот е предвиден како единствена економска активност во зоната за активно управување, организирана од надлежниот субјект.
Тоа значи дека приватно лице или здружение не може самостојно да го преземе управувањето, да го ограничува пристапот или да наплаќа влезници без соодветно законско овластување. Дали во конкретниот случај биле извршени узурпација на недвижност, противправна наплата, закрозување на сигурноста или други кривични дела треба да утврдат надлежните институции во постапка во која осомничените имаат право на одбрана и важи презумпцијата на невиност.
Општината претходно соопшти дека поднела кривични пријави и претставки до полицијата, Државниот пазарен инспекторат и Управата за јавни приходи. По настанот од 11 јули, СВР Куманово треба да ја комплетира документацијата и да утврди каква пријава ќе биде поднесена за непочитувањето на судската мерка.
