Градоначалникот Папазов на сослушување, ќе се бара притвор за 14 лица

Градоначалникот Папазов на сослушување, за Бектеши и 13 други лица ќе се бара притвор
Градоначалникот на Кочани, Љупчо Папазов, попладнево дава исказ пред обвинител во истрагата за катастрофалниот пожар во дискотеката „Пулс“, во кој загинаа 59 млади лица. Тој не е меѓу осумтемина за кои веќе е одреден краткотраен притвор, туку е дел од шест новоповикани на разговор во Основното јавно обвинителство во Кочани.

Обвинителството ќе бара притвор за вкупно 14 лица, меѓу кои и поранешниот министер за економија Крешник Бектеши, вработени во Министерството за економија и Дирекцијата за заштита и спасување. Нови докази и осомничени произлегуваат од анализата на одземените телефони, компјутери и серверски податоци.

Во меѓувреме, протестите во Кочани ескалираа – демонстрантите ја каменуваа општинската зграда, а во градот беа искршени контејнери. Министерот за внатрешни работи, Панче Тошковски, најави дополнителни апсења, вклучително и на вработени во МВР.

Обвинителот Љупчо Коцевски посочи дека Инспекцискиот совет ќе истражува кој од надлежните институции со постапување или со молчење дозволил дискотеката да работи 15 години без лиценца и основни безбедносни стандарди.

Трагедијата се случи на 16 март, за време на концерт на групата ДНК, кога поради нелегална употреба на пиротехнички средства се запали плафонот. Со само еден мал влез, без доволно противпожарна опрема и без излез за евакуација, 59 луѓе загинаа, а над 150 се повредени. Од нив, 50 се со тешки изгореници, 84 лица се хоспитализирани во Македонија, а 51 ќе се лекуваат во странство.

На осомничените за кривичните дела против сигурноста и здравјето им се закануваат затворски казни од три до 20 години.

Извор 24 Инфо