Skip to content
Со пристигнувањето на дваесетина етаблирани уметници од 16 земји, денеска во Струга почнува десеттото, јубилејно издание на Меѓународниот ликовен симпозиум. Под отвореното небо, инспирирани од тиркајната површина на Охридското Езеро и живописниот крајбрежен пејзаж, творците ќе создаваат дела што кулминацијата ќе ја доживеат на завршната изложба на 29 јуни во Центарот за култура „Браќа Миладиновци“.
Организатор е Здружението за уметност и култура „SILINDAR’T“, предводено од проф. Бурхан Ахмети, а симпозиумот се реализира со поддршка од повеќе донатори. Кураторскиот тим го сочинуваат уметниците Берат Зулбехари и Верим Зендели, додека ликовната критичарка Јелдез Асани ќе ги следи и оценува творечките процеси.
Годинава програмата е збогатена со тркалезна маса посветена на современите предизвици во ликовната уметност и улогата на симпозиумите во културната размена. Очекувањата се од дискусиите да произлезат конкретни препораки за зајакнување на македонската уметничка сцена и поттикнување меѓународни соработки.
Посебно внимание привлекува гостувањето на швајцарскиот фотограф Ромир Имами, кој ќе одржи едукативна работилница на тема „Како да ги дигитализираме уметничките дела“. Обуката е насочена кон уметниците, но е отворена и за сите заинтересирани, вклучувајќи локални креативци, студенти и ентузијасти.
Симпозиумот е отворен за јавноста, а организаторите ги повикуваат граѓаните и туристите да го проследат процесот на настанувањето на уметничките дела, да се запознаат со авторите и да бидат дел од оваа културна приказна која, како што нагласуваат, има значаен придонес за визуелната уметност и културниот туризам во регионот.
