Skip to content
Вкупно 1.451 набљудувач ќе ги следи осмите локални избори во Македонија, што ќе се одржат во недела. Според податоците на Државната изборна комисија (ДИК), акредитирани се 807 домашни и 644 странски набљудувачи, како и 12 странски новинари.
Најголем број домашни набљудувачи има Здружението за развој на општествено-социјални иновации „ВАКЕ УП“ – Скопје, со 549 лица. Меѓу акредитираните организации се и МКЦ-Битола (23 набљудувачи), ЛАГ Агро Лидер – Кривогаштани (5), Интерактив Битола (8), Ромалитико – Скопје (10), Здружението „За Тетово“ (5), Националниот совет за родова рамноправност (25), Планинарски спортски клуб „КАБ Струга“ (16), Евротинк – Центар за европски стратегии (4), ЦИВИЛ – Центар за слобода (60), Три Си Консалтинг – Скопје (6), Институтот за економски стратегии и меѓународни односи – Охрид (27), Националната мрежа „Жените за жените“ (20), како и Демокраси Лаб Тетово, Инклузива, ИНСОК, ИНТЕГРА НАУ и други здруженија.
Меѓу меѓународните набљудувачи, најбројна е ОДИХР – Канцеларијата за демократски институции и човекови права, со 524 претставници. Следуваат Амбасадата на САД во Скопје (30), Европскиот парламент (12), Британската амбасада (11), Амбасадата на Холандија (10), Централната изборна комисија на Косово (10) и Амбасадата на Франција (9).
Меѓу акредитираните се и претставници од Унгарија, Хрватска, Швајцарија, Албанија, Турција, Словачка, Украина, Молдавија и Грузија, како и Меѓународната фондација за изборни системи (IFES) со седум набљудувачи.
ДИК соопшти дека сите набљудувачи ќе имаат пристап до избирачките места, како и до процесот на броење и утврдување на резултатите, во согласност со законските прописи и изборниот кодекс.
