Skip to content
Европскиот авиопроизводител „Ербас“ ќе мора да приземји околу 6.000 свои авиони ширум светот, откако истрагата на еден неодамнешен инцидент покажала дека силната сончева радијација може да влијае врз компјутерите за контрола на летот. Од компанијата велат дека повеќето летала ќе бидат вратени во употреба по кратко ажурирање на софтверот, но дел од постарите модели ќе останат на земја подолг период.
Според „Ербас“, проблемот бил откриен за време на истрага за инцидент од минатиот месец, кога авион на „ЏетБлу“, на лет од САД кон Мексико, ненадејно изгубил висина и бил принуден да слета во Флорида. Најмалку 15 патници биле повредени.
Кои модели се засегнати?
Покрај најпродаваниот модел А320, проблемот се однесува и на авиони од сериите А318, А319 и А321.
– За околу 5.100 авиони се очекува проблемот да се реши со стандардно софтверско ажурирање што трае околу три часа.
– Околу 900 постари авиони ќе треба подетална интервенција, односно физичка замена на компјутерските компоненти, што значи подолго приземјување.
Последици и одложувања
„Ербас“ призна дека ова ќе предизвика значителни оперативни нарушувања за авиокомпаниите и патниците и упати јавно извинување.
Првичните информации покажуваат дека „Ер Франс“ е меѓу најпогодените компании – утрово биле откажани 50 летови до и од Париз. Во САД, „Американ ерлајнс“ соопшти дека 340 негови авиони се засегнати и дека се очекуваат одложувања.
Што точно е проблемот?
Проблемот е лоциран кај дел од софтверот за пресметка на висината на авионите од семејството А320. „Ербас“ утврдил дека на големи надморски височини, податоците од овој систем може да бидат привремено нарушени од интензивната сончева радијација што повремено ја емитира сонцето.
Токму тоа довело и до октомврискиот инцидент со наглото губење на висина. Од „Ербас“ подвлекуваат дека ова е единствениот познат случај од ваков тип, но сепак се одлучиле за превентивно приземјување за да се гарантира безбедноста.
Компанијата уверува дека процесот на ажурирање ќе се одвива брзо и дека најголем дел од авиони ќе се вратат во редовен сообраќај во краток рок.
