Skip to content
Евростат објави нови податоци за распространетоста на е-трговијата во Европа, кои покажуваат дека земјите од Западен Балкан значително заостануваат зад просекот на ЕУ. Во текот на 2024 година, граѓаните на Балканот на возраст од 16 до 74 години речиси двојно поретко купувале преку интернет во споредба со жителите на земјите членки на Унијата.
Северна Македонија над дел од регионот, но под ЕУ
Просекот на ниво на Европската Унија изнесува 60,2 проценти. Во Северна Македонија, 39,4% од граѓаните лани нарачувале стоки или услуги онлајн – повеќе во однос на Босна и Херцеговина (34,8%), Црна Гора (24,5%) и Албанија (16,3%), но и понатаму значително под европското ниво.
Секоја од овие земји е третирана како поединечен статистички регион во извештајот.
Србија со највисоки стапки на Западен Балкан
Србија е единствената држава во регионот со повеќе статистички области. Во Белград, 52,4% од населението пазарува онлајн – бројка која е блиску до европскиот просек. Во другите региони стапките се пониски:
- „Јужна и Источна Србија“ – 44,3%
- „Шумадија и Западна Србија“ – 44,9%
- Војводина – 48,4%
И ЕУ-членките од Балканот под просекот
Евростат нотира дека и дел од балканските членки на ЕУ заостануваат зад европскиот просек:
- Хрватска – 52,5%
- Словенија – 49,8% во источниот и 58,9% во западниот регион
- Грција – од 40,8% („Централна Грција“) до 57,3% („Северна Грција“), со исклучок на „Егејски Острови–Крит“ каде е 68,3%
Најслаби резултати во Бугарија и делови од Романија
Бугарија има најниска стапка на онлајн купување во ЕУ – од 21,7% во југоистокот до 44,7% во југозападниот регион (Софија).
Во Романија, онлајн купувањето е најзастапено во Букурешт (51%), додека во останатите седум региони се движи меѓу 26,4% и 40%.
Новите податоци ја потврдуваат долготрајната состојба: Западен Балкан и понатаму значително заостанува во дигиталната трансформација во трговијата, со големи разлики меѓу државите и внатрешните региони.
