Skip to content
Здружението на преведувачи и толкувачи на Македонија (ЗПРМ) денеска свечено го одбележува својот 15-годишен јубилеј – период во кој организацијата прерасна во еден од најзначајните чинители во развојот и афирмацијата на преведувачката и толкувачката професија во земјава.
На настанот, што ќе се одржи попладнево, ќе бидат претставени почетоците на ЗПРМ, клучните проекти реализирани во изминатите 15 години, како и активностите кои придонеле за унапредување на стандардите, обуката и видливоста на професијата. Воедно, ќе бидат врачени признанија и благодарници за основачите, поранешните претседатели и истакнати членови што оставиле значаен белег во работата на здружението.
„Овој јубилеј е доказ за нашата доследност, професионална посветеност и континуирана борба за подобрување на условите за работа на преведувачите и толкувачите во Северна Македонија,“ порачаа од ЗПРМ.
Основано во декември 2010 година, Здружението активно работи на воведување високи професионални стандарди на пазарот, поддршка на континуираниот развој на своите членови и зајакнување на јавната перцепција за значењето на двете професии. Во изминатата деценија и половина, организацијата се етаблираше и како партнер на институции, компании и меѓународни организации кои се потпираат на квалитетен и стручен превод.
ЗПРМ најавува дека и во наредниот период ќе остане посветено на унапредување на професијата, заштита на интересите на преведувачите и толкувачите и промовирање на висококвалитетни јазични услуги.
