Skip to content
Цената на среброто во изминатата година порасна за неверојатни 270 проценти, далеку побрзо од златото, кое традиционално важи за најсигурна инвестиција. Овој раст ги изненади дури и аналитичарите и повторно го насочи вниманието на инвеститорите кон „белиот метал“.
Рекорди на пазарот на благородни метали
Трендот на раст на благородните метали продолжува и во 2026 година. Откако цената на златото ја надмина психолошката граница од 5.000 долари за унца, и среброто за првпат во историјата ја надмина границата од 100 долари, достигнувајќи рекордни 117,69 долари.
Според податоците на Дојче веле, златото во 2025 година поскапело за околу 65 проценти, додека среброто забележало раст од дури 148 проценти – најголем од крајот на 70-тите години.
„Високодинамичен раст“
Аналитичарот на HSBC, Јерг Шерер, оценува дека среброто се наоѓа во „високодинамичен растечки тренд“. Само од почетокот на 2026 година, цената на среброто е зголемена за повеќе од 45 проценти, додека златото бележи раст од околу 21 процент.
Причините се повеќеслојни – геополитичката нестабилност, војните, несигурноста на финансиските пазари и падот на доларот ги прават благородните метали привлечна „сигурна зона“ за инвеститорите.
Соларната енергија ја зголемува побарувачката
За разлика од златото, среброто има и силна индустриска улога. Над половина од глобалната побарувачка доаѓа токму од индустријата, особено од:
- производство на соларни панели
- електрични возила
- електроника и телекомуникации
- дата-центри и вештачка интелигенција
„Развојот на обновливите извори на енергија драматично ја зголеми побарувачката за сребро, особено во фотоволтаичните системи, каде што тешко може да се замени без губење на ефикасност“, вели Соња Мартен од германската ДЗ банка.
Производството не ја следи побарувачката
Дополнителен проблем е што понудата не успева да ја следи растечката побарувачка. Над 70 проценти од среброто се добива како нуспроизвод при ископување на бакар, цинк и олово, а само 30 проценти од примарни рудници.
Тоа значи дека производството не може брзо да се зголеми дури ни кога цените растат, што создава таканаречен структурен дефицит на пазарот.
Малку шпекулации, но растечки ризик
Интересно е што растот на среброто не е предизвикан од шпекулативни фондови. Податоците од берзанските извештаи (CoT) покажуваат дека хеџ-фондовите не се главните двигатели на цената.
Сепак, аналитичарите предупредуваат на можен ризик. Односот меѓу цената на златото и среброто – таканаречениот gold-silver ratio – моментално е околу 47, што е најниско ниво од 2011 година.
„Тоа може да укажува дека среброто веќе е преценето“, вели аналитичарот на Комерцбанк, Карстен Фрич.
Иако фундаменталните показатели остануваат силни, експертите предупредуваат дека во 2026 година се можни големи осцилации. Брзиот раст носи и зголемен ризик од корекција.