Skip to content
Војната на Блискиот Исток веќе не е само геополитичка тема, туку почнува директно да влегува и во летните одмори на европските граѓани. Ударот прво доаѓа преку авионските билети: растот на цената на нафтата и нарушувањата во воздушниот сообраќај ги креваат трошоците на авиокомпаниите, а дел од нив веќе почнаа да ги префрлаат тие поскапувања врз патниците. Горивото за авиони, кое пред ескалацијата се движеше меѓу 85 и 90 долари за барел, скокна на 150 до 200 долари, додека дел од превозниците веќе најавија или воведоа повисоки цени на билетите.
Паралелно со ова, конфликтот го растури и вообичаениот авионски ритам меѓу Европа, Заливот и Азија. Голем дел од воздушниот простор на Блискиот Исток беше затворен или ограничен поради ризик од ракети и дронови, што доведе до десетици илјади откажани, пренасочени или поместени летови ширум светот. Бидејќи Дубаи, Доха и Абу Даби се меѓу клучните раскрсници на светската авијација, нарушувањето во тој регион многу брзо се прелеа и врз глобалниот туризам.
Најбрзо реагира пазарот на одмори. Дел од туристите што планирале патувања кон источниот Медитеран и дестинации поблиску до зоната на конфликт сега ги менуваат плановите и се префрлаат кон западниот и северниот дел на Медитеранот. Во последните денови расте интересот за Шпанија, Хрватска, Португалија, Италија и Малта, а дел од авиокомпаниите и тур-операторите веќе зборуваат за нагло пренасочување на побарувачката. Една нискобуџетна компанија дури најави дека дел од капацитетите од Блискиот Исток ќе ги пренасочи кон европски leisure дестинации, меѓу кои се и Хрватска и Шпанија.
Тоа значи дека летото 2026 може да донесе двоен удар за патниците. Прво, картите за летови веќе одат нагоре поради поскапото гориво и поскапите рути. Второ, таму каде што побарувачката ќе се концентрира поради чувството на поголема безбедност, ќе растат и цените на аранжманите, сместувањето и преостанатите авиоседишта. Во дел од европските пазари веќе се бележат нагли скокови на цените на преостанатите седишта, токму затоа што многу патници во ист момент се обидуваат да избегаат од ризичните коридори и да резервираат „помирни“ дестинации.
Во оваа нова карта на туризмот, Хрватска и Шпанија добиваат неочекуван бонус од војната. Не затоа што нудат нешто драматично ново, туку затоа што во време на неизвесност изгледаат поблиску, поедноставно и побезбедно за европскиот турист. Но за патниците од Македонија, пораката е многу поедноставна: ако конфликтот продолжи, летувањето со авион оваа година ќе биде поскапо, а евтините опции ќе исчезнуваат многу побрзо од вообичаено.