Шест дена ќе трае погребната церемонија за поранешниот врховен водач на Иран, ајатолахот Али Хамнеи, кој беше убиен на 28 февруари

Шестдневната погребна церемонија за поранешниот врховен водач на Иран, ајатолахот Али Хамнеи, кој беше убиен на почетокот на војната меѓу САД и Израел и Иран на 28 февруари, започна денес во Техеран, објави полуофицијалната иранска агенција Мехр.

Агенцијата наведува дека во текот на следните шест дена, телото на Хамнеи ќе патува од Техеран преку Ком и Наџаф до Машхад во североисточен Иран, каде што ќе биде погребан.

Ковчегот со телото на Хамнеи беше однесен во молитвената сала во џамијата Имам Хомеини во Техеран, каде што неговите поддржувачи се собраа на почетокот на погребот.

Иранските власти очекуваат помеѓу 15 и 20 милиони луѓе да се соберат на улиците на градовите низ земјата за време на погребот на Хамнеи, според Мехр.

Во текот на денот, ќе има посебна церемонија за збогување за странските претставници.

Мехр наведува дека високи функционери и претставници од повеќе од 30 земји, вклучувајќи ги Русија, Кина, Пакистан, Индија, Грузија и Куба, пристигнале во Техеран за погребот на Хамнеи.

Пред почетокот на церемонијата на збогување, иранскиот претседател Масуд Пезешкијан ги повика Иранците да се збогуваат со Хамнеи, додавајќи дека неговата смрт е голема загуба што ја открива и силата на темелите на Исламската Република.