Skip to content
Водата од градскиот водовод во Валандово од 24 јули повторно може да се користи за пиење, откако Агенцијата за храна и ветеринарство ја укина привремената забрана, соопшти градоначалникот Ѓоко Камчев.
Забраната беше воведена откако една од анализите покажала присуство на арсен од 14 микрограми на литар, над дозволената граница од 10 микрограми. Новата вонредна анализа на Институтот за јавно здравје покажала 1,47 микрограми арсен на литар, односно вредност во дозволените граници.
Камчев рече дека не може целосно да го објасни различниот резултат, но претпоставува дека повисоката концентрација можеби се појавила при зголемено пумпање на водата и придвижување на наталожени елементи. Тој ги повика граѓаните да ги следат официјалните анализи, наместо непроверените информации на социјалните мрежи.
Во наредниот период се најавени дополнителни вонредни анализи за следење на квалитетот на водата. Привремената препорака водата да се користи само како техничка беше објавена на 22 јули, до добивање резултати што ќе ја потврдат нејзината исправност.
