Трамп тврди дека САД имаат целосна контрола над Ормускиот Теснец

Американскиот претседател Доналд Трамп изјави дека САД во целост го контролираат Ормускиот Теснец, еден од најважните поморски премини за светската трговија со нафта. Неговата изјава доаѓа во услови на зголемени тензии со Иран и продолжена американска поморска блокада на иранските пристаништа. 

„САД имаат целосна контрола над Ормускиот Теснец“, порача Трамп во објава на својата социјална мрежа, додавајќи дека смета оти Вашингтон треба да ја задржи контролата врз стратешкиот премин. 

Ормускиот Теснец е од клучно значење за глобалниот енергетски пазар бидејќи преку него минува голем дел од светската трговија со сурова нафта и нафтени деривати. Затоа секое нарушување на поморскиот сообраќај низ овој теснец има директно влијание врз цените на енергенсите и глобалните пазари.

Изјавата на Трамп доаѓа во период кога Вашингтон и Техеран продолжуваат со меѓусебните притисоци, додека посредниците се обидуваат да ги приближат двете страни кон договор. Иран, од своја страна, ги отфрла тврдењата дека САД имаат целосна контрола врз теснецот и инсистира дека неговото отворање е поврзано со исполнување на условите што ги поставува Техеран. 

Во последните денови сообраќајот низ Ормускиот Теснец е значително намален. Според актуелните податоци, во вторникот низ теснецот поминале само осум пловила, наспроти околу 130 до 140 пловила дневно пред почетокот на конфликтот. 

Американската блокада веќе има и конкретни последици врз поморскиот сообраќај. Американските сили неодамна отворија оган врз товарен брод кој, според Вашингтон, се обидел да ја пробие блокадата на иранските пристаништа. На бродот избувнал пожар, но нема пријавени жртви меѓу членовите на екипажот. 

Трамп во изминатиот период повеќепати тврдеше дека американските сили го контролираат теснецот, додека Иран исто така инсистира на сопствена контрола врз стратешкиот поморски коридор. Тоа дополнително ја зголемува неизвесноста околу иднината на поморскиот сообраќај и снабдувањето со енергенси. 

Во исто време, Вашингтон и Техеран преку посредници продолжуваат да разменуваат пораки за можно решение, но ставовите околу повторното отворање на Ормускиот Теснец остануваат една од клучните точки на спорот.