Skip to content
Почна изградбата на втората и најсложена фаза од автопатот Скопје-Блаце, од клучката Стенковец до близина на граничниот премин со Косово. Делницата е долга 10,5 километри, а поради ридско-планинскиот терен на неа ќе се градат пет двоцевни тунели, осум мостови и десетици други инфраструктурни објекти.
Изведувач на работите е домашната компанија „Гранит“, а предвидениот рок за изградба е четири години. Новата траса ќе се поврзе со веќе изградените околу 1,5 километри автопат кај Блаце, со што целата автопатска врска треба да достигне околу 12 километри.
На почетокот на изградбата присуствуваа премиерите на Македонија и Косово, Христијан Мицкоски и Албин Курти, министерот за транспорт Александар Николоски, директорот на ЈП за државни патишта Коце Трајановски и претставници на меѓународните финансиски институции.
Трасата минува низ тежок терен на Скопска Црна Гора. Според официјалниот проект, покрај петте двоцевни тунели и осумте мостови, ќе се изградат 11 потпатници, четири галерии и девет потпорни ѕидови. Автопатот ќе има два коловоза со по две сообраќајни ленти и ленти за застанување. ЈП за државни патишта ја наведува проектираната вкупна ширина на автопатот на околу 24,5 метри.
Финансиската конструкција е обезбедена со заем од Европската банка за обнова и развој и европски грант преку Инвестициската рамка за Западен Балкан. Во јули беше потпишан грант од 30,8 милиони евра, додека ЈПДП соопшти дека заемот за проектот изнесува 167,6 милиони евра.
Автопатот Скопје-Блаце е дел од пошироката европска транспортна мрежа и треба значително да го забрза патувањето меѓу Скопје и Приштина. Проектот треба да ја подобри и патната врска на Македонија преку Косово со Албанија и пристаништето Драч.
Постојниот пат кон Блаце ќе остане во употреба како алтернативна врска и по изградбата на автопатот.
