Сточарите од Пелагонија во среда на протест кај Тополчани

Сточарите и земјоделците од Пелагонија најавија протест за среда, 30 септември, поради неисплатените премии за млеко и дел од земјоделските субвенции. Протестот ќе почне во 11 часот кај Тополчани, на патот Битола – Прилеп, во близина на млинот „Осман“.

Организатори се здруженијата „Пелагониско поле“ и „Фармери Југозапад“, а најавено е дека протестот ќе трае околу час и половина.

Сточарите велат дека премијата за предадено млеко не им е исплатена од јули 2025 година и дека до почетокот на октомври ќе имаат заостанати исплати за десет месеци. Тие реагираат и на намалувањето на откупната цена на млекото, која, според нив, од околу 33 денари за литар минатата година паднала на околу 23 денари.

„Досега требаше да бидеме исплатени и за првиот квартал од 2026 година“, изјави Борче Бучински од здружението „Пелагониско поле“.

Здруженијата бараат сточарите да бидат вклучени и во подготовката на Програмата за финансиска поддршка за 2027 година. Едно од нивните барања е поддршката за одгледување крави да се зголеми на 250 евра по грло, наместо сегашните 8.000 денари.

Миле Кебакоски од „Фармери Југозапад“ вели дека претходно се обиделе проблемите да ги решат преку разговори со Министерството за земјоделство, но не успеале да остварат состанок со надлежните.

Последната исплата на премии за млеко била реализирана во март годинава, кога на 4.545 производители им биле исплатени 270 милиони денари за предадено кравјо, овчо и козјо млеко за периодот од јануари до јуни 2025 година. Премијата изнесува шест денари за литар кравјо и седум денари за литар овчо и козјо млеко.

Субвенциите по грло за 2025 година во меѓувреме се исплатени. Во август на 4.284 одгледувачи на говеда им биле исплатени околу 372 милиони денари.

Министерот за земјоделство Борче Серафимовски, пак, во четвртокот изјави дека во 2026 година се реализирани околу 90 проценти од средствата предвидени за финансиска поддршка во земјоделството. Според него, од планираните 7,295 милијарди денари досега се исплатени околу 6,512 милијарди денари.

Сточарите ги повикуваат и останатите земјоделци, претставници на институциите и компаниите со кои соработуваат да им се придружат на протестот.